徐濠縈冇飛冇face

潮人徐濠縈（阿徐）、藝人江若琳等昨日出席手錶品牌TISSOT新店開幕。父親節將至，阿徐表示會與老公陳奕迅（Eason）食飯慶祝，而囡囡包包已親手自製父親節卡。她又指下月是Eason生日，並揚言打算送咖啡機給他，並笑言：「唔通送BB？今年送唔切喇！」

搞到爭啲鬧交

阿徐大呻因Eason開騷，令她慘被朋友追飛兼被埋怨。她無奈說：「因為佢今次只係開三場，搞到畀人鬧開得少，我每場得兩三行飛咋！（咩人會優先？）成日見嘅朋友會優先。我真係冇飛，我認冇face。我同Eason為咗啲飛搞到爭啲鬧交。」對於Eason的門票被網上炒高好幾倍且吸引排隊黨，她認為難以控制，更自爆曾在日本買黃牛飛睇騷：「只要個價唔係太離譜都可以接受。」

江若琳歡迎Kay

而同場的江若琳被問到有傳謝安琪Kay將加盟其唱片公司，她表示絕對歡迎，並不擔心資源被分薄。問到對方會成為公司一姐？她說：「冇分，我心目中冇呢樣嘢。（唔當佢係一姐﹖）唔係，我係指唔會互相比較同爭。（佢喺其他唱片公司好麻煩﹖）唔會，我識佢同佢老公，佢哋都好好人。好多時藝人身不由己，有時唔係佢問題，而係公司問題，希望佢有個好開始。」

文：名人組