阿B享天倫攬女擦乳酪
父親節快到，已育有一子三女的鍾鎮濤（阿B），日前與女友范姜帶同兩名女兒鍾嘉晴及鍾懿外出享受家庭樂。當日約下午3時許，阿B一家現身灣仔一間乳酪店，同行還有一名外籍青年。范姜帶同女兒入內購買，阿B站在門外等候，期間有途人認出並眼望望，戴上黑超的B哥竟動也不動，如展覽的蠟像般企定定給途人參觀，狀甚有趣。
細女內地走紅
未幾見各人手持一杯乳酪步出，范姜與大B女鍾嘉晴先後餵B哥食乳酪，然後排排坐在門外花槽邊慢慢食。十多歲的大B女嘉晴，還坐爸爸大髀邊食邊撒嬌，B哥亦有攬住囡囡，場面溫馨。其後記者上前訪問B哥，他表示：「啱啱喺內地做完宣傳返嚟，趁得閒陪家人行街食嘢，早前同細女合唱咗一首歌，喺內地好hit，依家個女係小明星。」
另外，RubberBand成員阿正當日亦帶住一對年幼子女前往上址，三父女原本於店內坐低堂食，但當食至中段，阿正獨自走到門外傾電話，一對仔女見爸爸遲遲未折返，隨即掉低乳酪唔食，走出門口搵爸爸，之後齊齊取車離開。
文、攝：追蹤組