黃貫中怕從政：我實坐監!
黃貫中（Paul）對音樂的堅持27年不變，10多年前睇見studio長期入不敷支，落得「窮得只有結他」的窘境時，一度萌轉行之念；Paul自爆曾有人慫恿他參政，不過自知臭脾氣，恐因不平鳴動手打人而陷囹圄，故拒做政客。
我成為Beyond成員，眨吓眼都入咗行27年，雖然我真係好鍾意音樂，好熱愛創作，但喺10幾年前，Beyond宣布解散時，我真係有諗過放棄做歌手，一來覺得玩音樂真係賺唔到錢，大家知唔知我間studio有幾大開支？一個人要養晒成班人，單係講食飯錢，都要成萬蚊一個月，買汽水又幾千，電費又係幾千，問你驚未？窮Paul都有名你叫啦。
自信做記者稱職
二來學朋友話齋，年紀愈來愈大，都好應該諗吓將來，儲吓老婆本、儲吓棺材本都要啦！如果我唔做呢行，我覺得自己都有好多嘢做，以前我喺學校係讀平面設計，喺Beyond時都係負責設計，衰衰哋都係設計師一名，我可以返去做老本行。
我亦可以寫嘢，我諗我係個唔錯嘅記者，又可以寫吓專欄、做主持或搞吓生意，但我又發覺我想講嘅嘢，只有喺音樂裏面先可以表達到出嚟，唔通我去畫畫，啲人又會睇得明我想講乜咩？我成日話唔做唔做，但隻手仲猛喺度寫，想話唔做咩？其實我對呢行仲有感覺囉。
政治實在太污糟
因為我個人好直，講嘢又大聲，成日不平則鳴，家人、朋友都問我會唔會考慮參選從政，打正旗號為人民請命，近幾年甚至有政黨成員問我有冇興趣入黨添，不過我唔想囉，政治實在太污糟，我驚我會坐監，直情唔使驚，係一定會坐監，我真係會打人o架，一睇唔順超，唔會掟蕉，係會成張櫈車埋去，我覺得自己欠缺政治智慧，即係話我走得太快，吓吓掂啲唔應該掂嘅嘢，咁咪死得囉，我覺得要講嘢時，可以借我嘅音樂去表達，唔需要坐喺立法會嘅。