Hailey C.唔識波球味搭夠
歐洲國家盃期間，不論男男女女都會湊熱鬧投注一下足球，Hailey C.都認為小賭怡情，可以增加睇波時嘅刺激性，但佢就最憎爛賭男。Hailey C.又話，好多時女仔睇波都懵盛盛，但最緊要學識「好有球味」呢句百搭說話，咁就無往而不利喇！
無論歐洲國家盃同世界盃，已經再唔淨係波牛嘅事，身為o靚模，Hailey C.都出席過唔少相關歐洲國家盃嘅活動，佢好多時都見到女球迷，而且佢知道不少身邊朋友都會喺呢類大賽投注少少玩吓。
Hailey C.認為小賭怡情唔緊要，但最憎男人爛賭，問到如果有個爛賭男友點算好？佢話可以同男友「對賭」：「當然唔係賭錢啦！最好一人捧一隊，如果自己捧嗰隊有射門，就可以用唇膏喺對方臉上或身上畫一下，一樣可以睇波睇得好投入。」
怕被標籤膚淺
講開睇波，Hailey C.知道好多女仔都唔係好識足球術語，但一味話睇靚仔球星就毫無深度，好易畀人標籤成膚淺女人，Hailey C.有條好橋「醒」畀姊妹：「乜嘢打法好整體、踢法好秀麗呀未必隊隊都啱，如果諗極都諗唔到，就話『好有球味』，皆因呢個形容詞屬於百搭嘅，啲男仔都會對你另眼相看。」
大家又有冇對Hailey C.另眼相看呢？如果大家覺得啱聽，即刻download由《東方日報》、《太陽報》及《on.cc東方互動》為歐國盃推出嘅「歐國波Something」App，喺入面嘅「歐國妹Polling」中為佢全力打打氣，仲有機會喺觀塘apm同Hailey C.一齊睇歐國盃決賽添！