Kelly 受惠柯打唯一放生
「四大唱片」之一環球唱片公司和無綫就「備忘錄」事宜陷「無偈傾」地步，跟環球「結盟」的華納歌手周柏豪，方大同等卻得無綫「禮待」受訪，但主播明言未收到訪問環球歌手的通知，似明剃環球眼眉之嫌，不過環球一姐陳慧琳（Kelly）又不受限制照有訪問做。
「四大」的環球、華納唱片公司因不簽無綫提出的「備忘錄」，令雙方關係再度惡化。據知無綫對環球採取限量放生政策，只優惠非環球經理人的巨星級歌手，故昨晚Kelly出席時裝品牌活動時，「有幸」接受無綫娛樂新聞節目主持黎芷珊訪問，而黎芷珊則說：「訪問Kelly係公司柯打，佢係『special case』。」
Kelly坦言知環球和無綫之間「未傾掂數」，承認歌手無緣亮相無綫會受影響，她望在出碟前，事件可以解決，她又說無綫有邀她演出「紅白鬥」，但詳情不知，亦會依從唱片公司指示去做。」另外，屬環球歌手的孫耀威將出席亞視台慶演唱，明剃無綫眼眉。
柏豪同主持握手
至於跟環球同一陣線的華納，旗下歌手周柏豪，方大同、連雅詩等前晚演出新城音樂會時，無綫卻派娛樂新聞台主播黃建東（Derek）前來採訪，又和柏豪握手，Derek坦言：「前日收到公司通知要嚟，（破冰後）係第一次做番訪問，（咁環球歌手幾時做？）未收到通知。」
柏豪再做無綫訪問，他說：「每次有人訪問我都開心，有被重視嘅感覺。」但他未聞要演出下月７日的《翡翠歌星紅白鬥》。而大同則說：「無綫訪問我，我梗係做啦，主導權喺佢哋（無綫）度。」
環球高層譚先生昨聞無綫主播訪問華納歌手，而未聞要訪問Kelly以外的環球歌手？他說：「我好驚訝囉，係咪新城買咗無綫廣告時段呀？其實環球所有活動都有通知無綫，歡迎嚟訪問，佢哋嚟唔嚟係佢哋決定。」問他覺得無綫此舉是否「大細超」？他則說不作回應。而新城高層朱明銳則表示：「冇買無綫廣告。」
無綫非戲劇製作總監余詠珊則解釋：「其實係『環球』封殺我哋，喺娛樂新聞節目，我哋係採取開放態度，由於唔涉及歌唱演出，訪問主動權交由主持自理。」至於Kelly是「特別處理」一事，她就話歌手想做訪問，無綫無任歡迎。
文：音樂組