克勤聽「柯打」唔怕無綫詐型

李克勤、孫耀威、連詩雅（Shiga）、陳柏宇、Mr.等四大歌手昨日出席now芒果台記者會，大會宣布將跟湖南衛視打造新節目《操控音樂》，並於明年舉辦音樂頒獎禮，問克勤會否出席？他說：「樂壇可以容納好多唔同聲音，一個健康頒獎禮，每個歌手都要支持，自己身為一分子絕對支持。」

身為球癡的克勤還以足球做比喻：「歌手只係球員，要聽領隊Duncan（環球唱片高層）指示。」問怕唔怕觸怒無綫？他說：「唔會啩，唔知今年有冇份踢《勁歌》，冇咪睇囉，自己立場冇任何電視台合約，適合嘅工作都可以參與。」

克勤以波為喻，指他只是聽從領導指示的球員。

黃婉曼指去歐洲期間冇覺好瞓，搞到面都尖咗。

黃婉曼驚現V煞面

擔任司儀的黃婉曼鼻樑突變高挺，下巴仲V到可以拮人，疑似整容變靚，黃婉曼卻否認「變臉」：「我好落力做機瘦臉，又用辣椒膏推臉，雖然講笑問醫生我個鼻係咪唔夠高，但醫生話唔使整，多謝化妝師功勞。」黃婉曼指早前去了歐洲一個月勁辛苦，又冇食飯瞓覺，所以臉變尖了，還問記者：「係咪好叻吖！」

同場的Shiga經歷慾照風波後，又被爆連鎅19仔，問會否擔心被指濫交？她說：「唔想再回應，同佢哋真係朋友。」Shiga拒答曾跟幾多人拍拖，只說：「不斷好多唔好嘢出嚟，唔想不斷解釋，希望大家關注我嘅工作。」

文：音樂組