胡定欣盛女30 無懼抹黑
外表嬌滴滴的胡定欣，近來遭負面新聞纏身，但一向喜歡挑戰的她，本着「人善人欺天不欺」這個精神，即使面對流言蜚語仍可挺起胸膛面對！30歲的她，堅決要突破「剩女」規限，懶理別人目光，只求自己活出燦爛人生。
剩女只是熱潮
無綫藝員胡定欣近年經常在劇集中飾演反派角色，性格似被定性為負面，早前更被報道指她「姣溝」七男，不過在娛樂圈度過11個年頭的她卻似「百毒不侵」，面對緋聞亦只是一笑置之。
定欣深明自己毋須交代感情事，亦不在乎別人抹黑：「以前我都會因為呢啲報道而好唔開心，但人大咗、成熟咗亦唔會咁care啲news！都唔係第一次被雜誌咁寫，只係覺得會影響到其他同事。
其實我都真係好多謝本雜誌，因為撞啱我套劇《拳王》出街，就當免費宣傳，至於內容真係得啖笑！娛樂報道都係娛樂大眾，我唔會向大家交代我嘅感情事，我自己最清楚自己嘅感情事，我唔需要其他人評論我嘅感情事，亦唔在乎人哋抹黑我！」
現時女仔到了25歲仍未拍拖、結婚就會被標籤為「中女」，若達30歲更是「剩女」！但現時30歲的胡定欣坦言不會對號入座，亦不怕世俗的眼光，最重要是活出真我、展現燦爛人生：「30歲，呢個其實應該係人生最燦爛嘅時期，我都想提醒全香港嘅女仔，點解我哋要咁傻？點解要對號入座，畀個框框限制自己嘅生活？我諗剩女呢個term都只不過係一個熱潮，我相信過咗一段時間之後，大家就唔會再講！」
後記：
胡定欣與陳國邦於電視劇《拳王》中有大量以手語做的對手戲，一向甚有主見的胡定欣不禁呼爽：「我同國邦對戲嘅時候，身邊嘅人完全唔知我哋講緊乜、做緊乜，當正式埋位時更可以自己隨時嗌cut、嗌ＮＧ，因為導演唔識手語，只有我哋知道發生緊咩事，所以我哋可以話係大晒，哈哈！」
文：李佩珊
攝：劉智源
化妝：Jessica Chan, Francis
髮型：Matt Chiu, Hei @ Xenter
服裝：izzue