女星防狼辣招自保莊思敏出街搵仔陪

早前錄音室爆出醉姦疑雲，令圈中女星無不人心惶惶，大家紛紛討論如何自保。江若琳自食其力，專誠學習空手道的防狼術，於緊急時候更會狠狠地踢對方下體！而莊思敏則選擇假手於人，決定搵男人傍住，那麼便可輕鬆把色狼嚇走。

莊思敏「我會帶個男人出街囉，因為有個人喺身邊，無論打唔打得都好，起碼多個人，減少色狼埋身嘅機會。」

熊黛林「我諗佢哋見到我咁高大，而且個樣咁惡，應該會驚咗。不過我要着波鞋先可以去追啲衰人或者賊！我試過有一次揸車，見到有個女警追住個賊，我本來想停車幫手追，不過最後都係冇咁做，因為喺路中間，會頂住後面啲車。」

陳嘉寶（Anjaylia）「平日夜晚自己一個返屋企，行啲靜嘅地方就一定會打電話畀人傾偈。除此之外，有人教過我要時刻握實抽鎖匙，萬一有人從後攻擊我，就一拳打落去佢塊面度。」

蔡穎恩（Evelyn）「我覺得最重要係唔好單獨行動，就算係同好熟嘅朋友，都要有戒心，千祈唔好飲醉，要有警覺性。」

蔣怡「我會着好高嘅高踭鞋，咁高就可以嚇走啲色狼。而且着高踭鞋，就可以隨時除出嚟攻擊佢，又或者可以踢佢重要部位。」

Cheronna@Super Girls「我仲讀緊書嗰時，去補習有個人走嚟同我講我個校章好靚，之後就掃咗我個胸一下。嗰陣好細個唔知點做，如果係依家嘅我，一定會大叫、打佢，或者鬧爆佢！」

Yanny@Super Girls「我會用眼神嚟嚇走佢，上次坐車，有個男人喺我對面將對手放喺下體，用個袋遮住。我就正視佢，仲拎手機出嚟扮影佢，就嚇走咗佢。」

江若琳「我有上過一、兩堂空手道堂嚟學防狼術，佢教我如果畀人從後箍頸，對手發唔到力嘅話，就用腳踢對方嘅重要部位。」

藝人林司敏「我會靠自己把聲嚟防狼，有咩事就大聲叫同埋奔跑。其實我小學嘅時候見過露體狂，嗰時太細唔識反應。如果依家嘅話，我一定會報警！同埋我成日都會拎住抽鎖匙，有咩事可以用嚟拮佢。」

女星防狼 辣招自保 莊思敏出街搵仔陪