何國鉦 助陳煒變靚太

陳煒：煒 何國鉦：鉦

何國鉦在時裝圈打滾多年，與不少模特兒及明星合作無間。 翁嘉穗、江美儀、陳法蓉、何國鉦、鄺美雲、陳煒	何國鉦爆陳煒性格豪爽，但相處落發覺她非常女性化。	何國鉦大讚陳煒可塑性高，可嘗試不同形象。

煒：我哋相識12年，記得當時自己需要扮靚，透過記者認識你，經過你多年內、外改造，我都變咗好多，依家我復出，好多人覺得我靚過以前，其實你點睇？我以前短頭髮、包包面，依家有冇覺得我唔同咗？

陳煒曾穿上性感晚裝為何國鉦行騷。

陳煒結婚四年，最近復出幕前。

關係如兄妹

鉦：感覺當然係靚女，不過最初聽人暱稱你「煒哥」，心諗以為你好Man、好強！無錯，性格上你的確好豪爽，正如外間話你似梅艷芳，不止樣似，連佢豪爽性格都似，同你食飯埋單你要爭畀錢就知啦，絕唔扭擰，不過相處落我覺得你係好女性化，係需要人照顧，我當咗你係我妹妹咁照顧o架！

煒：我都好開心有個咁錫我嘅哥哥！我性格比較內斂，知心朋友唔係好多，但你嘅意見我會好肯接受！先講外形上，我以前出道係搵到吓錢，但唔識打扮，對裝身好迷惘，隨便入一間時裝店買衫，可以亂花一萬幾千，最後批衫係冇着過，又唔識攞啲衫出嚟配搭，始終覺得自己品味唔好，但我識咗你之後，我慳番好多錢！

鉦：由識你至依家，你變化都幾大，身形可以肥到着6號size瘦到着2號size都得，不過你身形好好，着起晚裝可以表現到健康嘅性感，講真性感唔一定要大胸，但你有得天獨厚嘅條件，露得起！我因工作關係接觸唔少靚女，我睇人好少失手，你可塑性高，藝人形象能夠千變萬化係最高境界，眼前嘅煒哥，我覺得係360度轉變！

洗師奶形象

煒：形象上你畀咗好多寶貴意見我，幫我包裝，教我打扮，我買衫都帶埋你去，近期我復出，外間覺得我靚過以前，其實我做咗「師奶」四年，平時煮飯唔使打扮，久而久之就好懶去扮靚，所以之前話復出，我都有諗係咪得，好彩我人緣好，好多朋友幫我！

鉦：你嫁咗老公後，做少奶奶係好幸福，但你老公又忙，經常周圍飛，依家又匿埋喺屋企，咁樣好易「封塵」，其實你又有條件，唔好「嘥」咗自己，所以我同一班朋友都好想你出番嚟做嘢，起碼個人唔會咁Out，有番啲活力！

煒：係o架！你真係好錫我，內、外都幫我諗，形象你幫我諗，過去幾年你都畀咗好多信心我，我先有勇氣行番出嚟，由拍廣告開始，出Event、晚宴至拍劇，生活比以前多姿多采，都有人問我咁耐冇拍劇，依家簽咗無綫拍就接咗兩套，一下子係咪Pick Up到？我都有諗過呢個問題，不過，既然揀得復出，就順其自然，我相信我食開呢行飯都可以應付，亦唔想令你失望！

通電次數多

鉦：我都對你有信心，你人緣好，得到好多人幫忙，你嘅大、小事我都好上心，只差唔係你經理人，哈哈。

煒：我知呀！你平日已經咁忙，但都可以每日同我通幾次電話，提我呢啲、提我嗰啲，傾電話次數多過我同我老公！

鉦：我遺傳咗我媽媽性格，好鍾意幫人，但有時未必有人欣賞，但你好領情，我當咗你係我屋企人，以前我有個細妹可以照顧，依家佢結咗婚有自己家庭，順理成章我咪照顧你囉！

採訪：影視組

攝影：黎志輝

髮型：Patrick So@HH Salon

服裝：何國鉦（Gucci）

陳煒（I Posh）