湯盈盈煲粥冷落鍾麗淇

盛傳與男友錢嘉樂好事近的湯盈盈，日前相約好友鍾麗淇及另一名女性友人行街，三個女人下午三點多步入商場，揀完手袋又揀新衫。未幾湯盈盈電話響，手持電話密密斟的她，七情上面傾到相當投入，完全無視被冷落在旁的鍾麗淇。被好友冷待的鍾麗淇，無聊地四圍望打發時間，未幾已發現記者鏡頭，鍾麗淇興奮地揮手打招呼，但掛住講電話的湯盈盈卻完全懵然不知，繼續傾得相當甜蜜蜜。