Baby女神入世 尋找未完初戀
年僅23歲的Angelababy（楊穎），憑藉甜美樣子成為宅男心目中完美女神，原來，女神內在比外在更令人動容。為了一段未完的故事，她四出打聽初戀男友的下落；為了與男主角分離，她嘗盡眼淚的味道；為了配合緋聞男友黃曉明的勤奮，她鞭策自己要更努力。女神不一定不食人間煙火，入世，也可脫俗。
壓力：與柯震東拍檔
初戀總是美好的。12歲已與男同學譜豆芽戀的Baby，雖然戀情無疾而終，但長情的Baby還是期待再與對方碰面，結果……
「我同初戀男友好純情，連臉都冇錫過，只出過兩次街。我哋冇真正講過分手，只係突然有日返學見唔到佢，佢啲同學話佢去咗日本。佢走咗之後，我心裏面一路有舊石頭，覺得故事未完結。之後我喺舊同學度打聽到佢嘅電話，喺佢生日時我send咗message畀佢，佢覆番我，我就即刻打畀佢約佢食飯咯！當然見番面嗰刻，個感覺經已完全唔同晒啦！」
加入影壇只有短短五年，Baby有幸與中港台型男合作，當中包括緋聞男友黃曉明。談起曉明，Baby雖點到即止，但仍大讚他勤力。
「我覺得黃曉明好勤力，我原本冇咁勤力架！雖然佢已經有依家咁嘅成就，但係喺片場都可以好勤力做嘢。至於合作電影《第一次》嘅趙又廷，我同佢合作過兩次，第一次唔係好傾到偈，第二次合作第一日就要拍咀戲，埋位嗰陣，我搵唔到佢，原來佢匿埋刷牙，令我好驚要錫到咩程度。後尾至知原來佢只係考慮我嘅感受，有啲受寵若驚，然後自己都走去食薄荷糖。」
竟有90後男友
「至於柯震東就令我好大壓力，估唔到做我男朋友嘅拍檔已經係90後，哈哈！佢好cute，會整蠱人，有次個造型師打呵欠，佢就好調皮咁問：『姐姐，要幫你call的士嗎？』好搞笑。至於成日扮我嘅王祖藍，我想話佢聽：『你扮我扮得唔係好似囉！雖然我黐得眼睫毛多，但唔係成日眨眼囉！當然我冇嬲，仲好鍾意睇佢嘅搞笑演出添。」
吃苦：五臟六腑爆炸
成功永遠要付出代價，女神亦不例外。去年一口氣拍了五部電影的Baby，高峰期試過數天都騰不出半點睡眠時間，有苦自己知。
「嗰排我踩到五臟六腑就都爆炸，我記得有日喺高雄機場，攰到望住條走廊，明明直都睇到係彎嘅。嗰刻我好期待喺飛機度瞓，好想快啲返到香港。嗰次我幾日冇瞓，因為要來回深圳同高雄拍戲。雖然好辛苦，但我從來唔會同媽咪講，因為怕佢擔心，而且呢個係我嘅選擇，既然選擇得就要承受，當然有時一個人合埋眼真係好想喊，但喊係冇用o架嘛，喊完又要補妝，咪盞自己搞自己！」
眼淚：搜尋虛幻情人
拍過無數甜蜜談情戲的Baby，坦言演出電影《全城熱戀》時，一度因捨不得談情對手而哭上數天，女神，原來也是用水造。
「好記得最後一場戲我全日都係喊戲，我喊完第二日返到香港，都仲有好多眼淚嘅味道，我唔明點解會咁。之後我有上網搵男主角啲MV嚟睇，我想知佢平時係點。當時我好悲傷，所以去咗游水，等啲水洗去眼淚嘅味道，而且游完水好攰可以返屋企瞓，第二日起身又係新一日。」
「其實我份人唔鍾意喊，除咗睇戲嗰陣。拍戲時只要投入都喊到，但有次真係喊唔出，因為拍嗰陣好凍，我成個人係咁震，而且我雖然只有一晚嘅戲份，但一嚟就要話我喊，時間太短我投入唔到，所以喊唔出，惟有滴眼藥水補救。」
後記
原以為女神遙不可及，原來女神也只是凡人。Baby雖然事業如日中天，但她的言行其實與一般23歲的女生無異。
拍照期間，Baby見到現場很多叉電器，即天真大嚷：「依家啲手提電話好易冇電，我帶兩部出街都唔夠用呀！啲電話商都好犀利，每次啲電話用咗一年，就壞壞地咁嘅。」她還與記者大談餵蚊苦況，邊說邊扁嘴，我見猶憐。
雖愛閒聊，但當知道攝影師的鏡頭已準備好時，Baby旋即進入狀態大擺靚甫。走紅，永遠不會只靠運數。
口述：楊穎
筆錄：影視組
髮型：Alex So＠P.O.P hairdressing
化妝：Will Wong
服裝：Alexander Mcqueen by Lane Crawford