陳豪導鄭少秋升仙
鄭少秋、陳豪首度合作，於劇集中大鬥演技，二人閒時大談紅酒、咖啡，秋官更指陳豪令他上了癮，而陳豪則大爆秋官可氹得任何年紀的女性都笑咪咪。
秋官、陳豪於劇集《心戰》中首度合作，惺惺相惜，他們除了談戲外，更不時以紅酒、咖啡為話題，秋官說：「經陳豪指教後，我對咖啡好似上咗癮咁，咖啡係好多好處，甚至可以減低肝癌百分率，我依家每日都飲杯咖啡，但係多又唔好，多就可能會致癌。我唔識飲，我追求苦甘，不過陳豪話酸酸哋先好飲。」
老婆「貓屎」上癮
秋官又指自從女兒買貓屎咖啡給太太品嘗後，都上了癮，日日一定要飲，他可有教陳豪要錫老婆？秋官即向在旁的陳豪說：「要好好哋錫佢，知唔知呀？」陳豪笑說：「秋官真係『楚留香』嚟，任何一個年紀嘅女性經過，佢都可以令人笑咪咪，佢有一種魅力，舉手投足都可以令人開心。」
吸引師奶擁躉
在《心戰》中，秋官、陳豪分別飾演演員、魔術師殺手，秋官坦言戲中為了查案，有不少戲中戲，沒有足夠時間給他揣摩角色，故相當辛苦：「時間唔夠，不過做電視就係咁。」說到這種劇種可能難以令一眾師奶觀眾投入時，陳豪坦言不擔心，更識做的說：「秋官已經好耐冇出現，佢都有一班擁躉。」秋官聞言即說：「呢套劇都係講破案，雖然好玄妙咁，但係演員嘅思想、行為都好清楚。」
文：影視組 攝影：唐豁莊