兩台聯播歐國盃 克勤恨跟阿叻鬥嘴
「無綫契仔」李克勤及黃婉曼昨日出席《麥當勞Xnow TV - 2012歐國盃Double Kick off記者會》，今屆歐國盃部分賽事與無綫聯播，克勤分外興奮，他說：「今屆有四場賽事同TVB聯播，係好友好嘅情況下做，我同叻哥（陳百祥）都好期待，希望搵啲嘢crossover。我會幫now做啲前奏節目，我係足球發燒友，唔當係工作，我睇好英格蘭捧盃。」
為轟歐洲畫面道歉
克勤又為新歌MV《決戰草原》出現轟炸歐洲畫面，觸動西方人士二次大戰傷痛，他表示：「成個創作團隊包括now都冇諗過會有咁嘅聲音出嚟，個MV用漫畫娛樂手法表達，歐洲有幾十萬點擊，若有任何人唔開心，我表示歉意。首歌有部分用咗隻蘇聯軍歌，只用曲冇用歌詞，我唔識蘇聯文，唔知同波蘭戰爭有關，真係發夢都冇諗過。國際足協都有聯絡now，依家已經重新剪過個MV，係我哋做音樂疏忽咗，希望波蘭人息怒。」
黃婉曼則自爆差點因足球而被打，她說：「之前去烏克蘭睇波，我喺人哋主場猛捧客隊，好在男主持提我，否則好易被人打。」
文：影視組