祖兒善心無限 捐500蚊嫌少
身為樂壇一哥一姐的古巨基和容祖兒聯同成龍及英皇集團主席楊受成昨日出席奧比斯眼科飛機醫院活動，身體力行熱心支持善舉。
楊受成率領英皇旗下藝人基仔和祖兒昨日出席奧比斯活動，席上成龍、基仔和祖兒擔任「奧比斯領航先鋒」。基仔表示一直是該機構的大使，出錢又出力，早年便隨救盲飛機到蒙古，並親睹在機上進行手術的過程，在旁的祖兒則笑言是名副其實的「大開眼界」。
問兩人可再以私人名義捐錢？祖兒稱：「我有問老闆楊生我使唔使捐啲，老闆話得架啦，公司捐咗500萬，叫我捐500蚊，我話500蚊咁睇小我！」基仔即插嘴說：「咁你捐500萬囉！」祖兒即反寸基仔：「咁又唔得，咁我捐咗你捐幾多先？」場面搞笑。
成龍讚祖名鑽石級
至於熱心公益的成龍笑言：「今次楊生（楊受成）捐咗啦，費事搶佢風頭。」談到兒子房祖名近日拍動作片，透露很佩服他這個爸爸，問祖名是否終於知道父親的辛苦？成龍表示：「佢知啦，知道老竇斷手斷腳咁養大佢，依家我等佢養。」成龍稱當年祖名賺到第一次錢就送他一張附屬卡，當時祖名第一句說：「希望你最好唔好用。」而他則一直珍而重之地放在保險箱內。問到可見過祖名的緋聞女友？成龍稱：「只係見佢帶一班朋友返屋企，有男有女。（祖名魅力如何？）最值錢係鑽石王老五，都有信心祖名會搵到一個好似佢媽咪林鳳嬌嘅女人！」
文：音樂組 攝：鄭家俊