紅姑開微博 唔怕fans示愛

紅姑昨日出席腕錶品牌TAG Heuer全新Link Lady系列腕錶揭幕酒會，透露近日開了微博戶口：「其實一路都想開，可以分享大愛。（有自拍相？）好少自拍，知好多人關注咗我。最想分享環保，欣賞大自然美。（開微博後有冇同好多朋友相認番？）我以前畀一個人愛，依家就畀好多人愛，我感受到，所以要做啲嘢報答fans。（同fans聯絡？）自己唔識同人相處，好隱蔽。」問是否想分享新事物而忘記過去不快事？她則表示沒有這種想法，亦不怕fans會在微博向她表白，因表白不代表她要跟對方見面。提到有指台灣女神陳妍希跟她相似，她即笑着反問：「你哋覺得似唔似？（你靚啲！）啊？係咩？我有睇佢成名作，套戲幾開心，搵番青春。」

影大肚照搞慈善

同場的丁子高就指太太楊千嬅個肚已非常大，但千嬅不想被影到「巨肚相」，於兩星期前外出用膳遇見記者拍照時即狂奔躲避，嚇得記者對千嬅說：「你唔好跑！我哋唔影你啦！」他又謂千嬅的肚雖比正常大，但臉沒有特別肥，現時體重跟他一樣是160磅。當提到攝影師夏永康替千嬅拍的大肚照，子高即說：「谷祖琳都諗住組合一班大肚婆同媽咪啲相，搞個慈善活動，但我同千嬅之前影嗰啲係私人珍藏，可能再另外幫佢影過一輯啦！（尺度？）肯定有着衫，依家好肥，游水都唔敢！」

丁子高指太太千嬅現時有160磅。

同場陳君宜（左）及羅霖盛裝出席。

姚書軼識劉定成

而行騷的名模姚書軼（Mikki）被問到富商劉定成涉嫌淫男模一案，問身為模特兒的前男友Sunny有否被邀影裸照？Mikki表示：「我同Sunny都識劉定成，Sunny唔會做呢啲嘢。其實好多人唔係咁好彩咁順利，有人想搵出路做自己鍾意啲事，冇唔啱，如果對方要求過分，男女都要識say no！」

文：名人組