徐子淇囡囡練畫有血有淚

徐子淇昨日以連身短裙出席藝術展，她表示自己喜歡雕塑，也會自掏腰包購買作品，亦會購後做慈善，她笑說：「我以前會掛喺房，不過啲女好鍾意跑嚟跑去，我驚佢哋撞跌整爛，所以唔敢放出嚟，都係收埋咗，等佢哋大個啲先放出嚟。依家佢哋好鍾意畫畫，我好驚佢哋喺我啲藝術品上面畫兩筆。」

徐子淇（左二）與一眾藝術家齊出席藝術展。

顧紀筠試過花六位數字買藝術品。

學校跌親唔開心

子淇又透露長女將會入讀小學，她自爆向別的小朋友媽媽收風，得知入學試會考畫畫，故就提議囡囡在家中試畫，她說：「個女竟然畫咗自己喺度喊，仲一邊流緊血，我見到時即刻好驚，心諗死火，我問佢點解？原來佢兩日前喺學校跌親，好痛好唔開心，我自己都唔記得咗，所以小朋友係會將自己嘅感覺畫出嚟，所以我就花好多心機同佢講，要勇敢同開心面對，唔係人哋見到啲畫就以為家庭暴力，最怕佢去入學試唔知畫咗乜出嚟。」

子淇又謂藝術能表達自己，因此她會讓囡囡學陶瓷、畫畫及運動，她續說：「囡囡好鍾意跳彈床，因為精力好勁，屋企有個彈床畀佢哋跳到夠，有兒科專家話，小朋友跳完再做功課會集中啲！」她又透露二女上周生日，她親自製了生日蛋糕和雞翼，並邀請囡囡的同學仔來家中開派對，慶祝一番！

六位數購藝術品

另外，有顧老闆之稱的顧紀筠有份出席藝術展，透露家中收藏不少藝術品，更試過花六位數字投買心頭好，她會將藝術品掛在屋企天花和餐枱上，曾有友人到訪她家食飯，都笑言要取走藝術品作禮。

文：名人組