陳慧琳細仔為食變大龍包

Kelly前晚與賭王千金何超雲、徐濠縈等出席IT旗下時裝品牌ISABEL MARANT新店開幕酒會，今次是Kelly產後首度復出公開活動，大騷長腿的她身材fit爆，產後已休息兩個月的她大叫好悶：「個人發晒霉。不過湊兩個幾辛苦，分身不暇，細仔都易湊，依家忙餵人奶。（餵到幾時？）餵到我離開香港囉。（幾時離開？）已計劃定，去一日就返嚟再餵。」

吸收營養多奶水

由於要餵人奶Kelly不能修身，很fit的她指得條腿可以騷，想多減十磅，但餵人奶要食好多雞、魚，吸收多點營養有更多奶水，她說：「小龍包依家13磅，好肥，變大龍包啦！佢肥嘟嘟似足『吹波仔』。（哥哥蝦餃仔會唔會呷醋？）如果我抱細佬太耐，佢會叫我唔好理細佬，快啲陪佢玩。」

Kelly笑指細仔「小龍包」十分大食，現時已變成「大龍包」。（資料圖片）	Kelly和超雲（右）與設計師Isabel Marant合照，大家笑容一致。	何超雲一身前衞打扮到場，身上的頸鏈購自英國。

忙於照顧兩名兒子，Kelly坦言夠晒數，暫時不想追女，她更笑言有為「小龍包」拍下沖涼裸照。工作方面，老公十分支持她復出，因不用在家被她「哦」！

超雲成「網」中人

何超雲表示近期多留在家中上網，她承認有意搞網上生意，仍在考慮中，尚未決定，她強調不會與男友陳山聰夾份做生意，但他有給予意見。超雲與山聰感情穩定，更大晒恩愛說常收到男友的禮物：「我比較小朋友，山聰成日送公仔同文具畀我，我就送飾物回禮。（近期爆出男藝人裸照風波，山聰有冇拍過裸照？）我冇留意報道，會打電話問吓佢有冇拍過，但我相信佢唔會拍。」

文：名人組