衞蘭：絕不向黎明Say Sorry！

2005年4月13日是我正式入行推出首張專輯嘅日子，轉眼經已7年，對音樂有「7年之癢」？我可以話7年之後我更愛我嘅音樂，開心可以繼續唱歌。還記得初出道的我好幸運「Boom」一聲就上位，之後經歷很多事情。呢七年以來，可能有做過令Leon失望嘅事，包括妹妹Jill在日本發生的事，我會代妹妹和自己向Leon說聲「對不起」，嗰段日子令他費盡心神。不過，在工作上我絕對唔會和Leon「Say Sorry！」，因為只講「Sorry」對件事根本無作用，倒不如我實實在在做好每個工作，做出成績補償錯失仲實際，與Leon的相處早有默契，已經做到心照不宣。

自由慣 難適應規矩

其實自己都有諗過當初黎明會選中我做歌手，我諗我一定令他好頭痛。尤其出道頭兩年，我無心理準備就紅咗，自己接受唔到呢個事實，每次上台都緊張到不停標汗，當時我又好曳、工作唔夠勤力，所有嘢加埋一齊，但Leon竟然冇放棄我，嘻嘻……我真的算走運呢！因為自細我都缺乏家人管教，鍾意做咩就做咩，逃學都冇人理，但做歌手之後，適應唔到有規有矩的娛樂圈，當時我經常遲到，當一個人遲到幾十次，無論你用任何藉口解釋都唔會有人再Buy你，當時Leon被我激到爆燈。

Janice希望用行動做出成績，報答Leon一直的容忍。

放大圖片

最記得以前助手要上門拍門捉我起身，大門拍到Boom Boom聲，我依然可以唔識醒，實在幾離譜。又以戒口為例，我會為食到靜雞雞將麵包搓到好細放喺手中，等助手唔為意就偷食。其實自己都好想聽話學乖，但用盡所有方法都做唔到。而我都覺得Leon絕對有權鬧我，係我達唔到基本要求，我唔會因為佢鬧我而當佢係「衰人」。

冇老闆 生活會糊塗

好多人問可視Leon為我恩人？Leon本身是已結集歌手、老闆、朋友多重身份，喺不同時候幫助我，若Leon無畀機會我唱歌，我相信我嘅人生會一塌糊塗。他是值得尊敬的人，就算我以前多不聽話，他對我嘅信心都無變過，沒有放棄過我。相反Leon從來不鍾意向我講一大堆訓話，他會用「眼神」跟我溝通，我好記得Leon每個眼神和表情，像和我說：「我知你掂嘅，你得o架！」你給我的信任眼神我當然收到。

Janice是中菲韓混血兒，有雙胞胎妹妹衞詩（Jill），父母二人早年離異，Janice隨韓籍母親到韓國居住，11歲跟父親Joey Vidal返港與妹妹生活，而兩姐妹本身只有英文名，是兩人簽約Amusic唱片公司後才改中文名。出道成名作《大哥》，大熱歌曲有《心亂如麻》、《愛才》、《離家出走》等等，而《男人信什麼》更贏得2010年度十大勁歌金曲《金曲金獎》。

Profile

中文姓名：衞蘭　

英文姓名：Janice M. Vidal

出生年份：1982年4月13日

喜歡音樂：R & B, Jazz, Blues

出道年份：2005年4月

口述：衞蘭　筆錄：音樂組　攝影：劉智源

場地：點一龍

化妝：江中平@A & V Makeup School

髮型：SunnyYu@Hair Culture