霆鋒謝賢 無Chok不作
每次謝賢被問及兒子謝霆鋒近況時，他例必笑言與兒子不熟落，但其實私底下十分老友。前晚兩父子到跑馬地與友人飯聚，期間眾人於門外吹水時，一向Chok到爆的霆鋒，與父親不約而同單手插袋，果然父子同心。
片約不斷的霆鋒最近難得放假，早前返港與栢芝出席大仔Lucas的家長日後，即傳出兩人復合消息。雖然鋒芝事後表明不會復合，但上星期細仔Quintus兩歲生日，兩人又輪流與細仔慶祝，力保愛兒心目中的父母形象。
邊行邊做伸展運動
前晚八時許，不用湊仔的霆鋒與老竇謝賢（四哥）到跑馬地黃泥涌道Amigo餐廳食飯，同場還有髮型師好友郭子輝（Ricky）及數名男女友人。期間霆鋒兩父子煙癮發作，與Ricky及助手表哥到門外煲煙吹水，之後又折返入內繼續開餐。約15分鐘後，眾人又再出外。
眾所周知，四哥單手插袋型仔甫士深入民心，可稱得上是第一代Chok王，霆鋒當然盡得父親真傳！兩父子除了有傾有講外，更不約而同左手插褲袋，非常一致。未知霆鋒是否因早前拍戲弄傷肩膊，見他返回餐廳時，邊行邊做伸展動作鬆鬆右膊。醫肚後，眾人未有離開，繼續站於門外吹水，傾足五分鐘才捨得走人。霆鋒跟友人道別後，與四哥一同乘車離開。
郭偉亮聽友人傾訴
另外，霆鋒的好友郭偉亮（Eric）前晚撇下老婆葉佩雯，與男友人到跑馬地一間酒吧飲嘢吹水，一身運動服打扮的Eric似做完運動，當晚只飲清水。期間見男友人不停講，Eric則細心聽友人傾訴。
文、攝：追蹤組