成龍爆權相佑：佢好愛我
成龍正在康城電影節宣傳英皇電影《十二生肖》，他於記者會上心情大靚，如開籠雀般不停講話。期間拍檔權相佑以韓文答問題後，成龍即搶答：「佢話佢好愛成龍呀！」引得全場爆笑。
【戴佩玉康城直擊】國際巨星成龍正於康城為投資逾億元的英皇電影《十二生肖》進行連串活動，康城時間昨早他率領一眾演員包括韓星權相佑、劉承俊、廖凡以及「龍女郎」姚星彤、張藍心及Laura Weissbecker出席電影記者會。心情大靚的成龍化身開籠雀，又為其他演員遞水，表現親民。當權相佑以韓文答問題後，成龍即搶答說：「佢話佢好愛成龍呀！」全場笑聲不絕。
聽老婆話讚祖名
成龍表示未知將來體力如何，故今次是其最後一部大型動作片：「可能之後拍文戲多啲，外國有奇連伊士活、羅拔迪尼路，我朝呢個方向走，或者拍吓Superman，都應該拍到。」問到為何最後一部大作不起用兒子房祖名？成龍表示是秘密，但電影於年底上映時一定會帶來驚喜。成龍又讚祖名於新片《寶島雙雄》的動作演出：「我有搵成家班幫佢，但我有功夫底，佢要似我，仲要努力十萬八千倍，佢阿媽次次都話我踩佢，今次我話幾好，我有讚喇！」
成龍又大談與新「龍女郎」姚星彤合作的趣事，起初他以為對方懂潛水，因此放心拍跳水戲，豈料臨場時，姚星彤嚇得依嘩鬼叫。他說：「原來佢話淺水OK，我聽錯咗做潛水，但我冇理，照丟佢落水，佢就不停捉實廖凡隻手。」提到成功申請在法國多個博物館取景，成龍自豪地表示當局爽快答應，慶幸只打爛兩件物品，並已作出賠償。
前晚成龍率領演員亮相《Rust & Bone》紅地氈後再現身中國之夜，他帶同新七小福表演上台宣揚中國旅遊業，但因舞台在海中心，他坦言有少許暈船浪。
《A計劃》獲致敬
此行成龍深得電影節方面重視，大會特別挑選其經典作品《A計劃》作致敬，亦是一眾致敬作中唯一一部華語作品。另外，成龍在韓國的事務所正打造樂隊JJCC，由四至五名男生組成，當中有中國人及韓國人，樂隊將於八月底出道。