譚凱琪親小企鵝 眼見心謀

有線旅遊節目常客譚凱琪經常因工作關係奉旨歎世界，早前她坐郵輪展開亞洲之旅，短短10日旅程先後到訪基隆、長崎、釜山、上海、大連等地，更被誤為未成年，氹得她相當開心，Zoie說：「第一次坐郵輪，艘船有成18層樓咁高，一千呎咁長，有得歎spa，又可以跟調酒師學調酒，調酒師起初以為我『未夠秤』唔敢教我調酒添！佢變相讚我年輕，我梗係開心啦！」

手感似摸狗

Zoie今次達成多年心願，在長崎企鵝水族館近距離接觸可愛爆燈的小企鵝，她說：「有百多隻來自不同地方的企鵝，每個品種的企鵝稟性都不一樣，其中洪氏環企鵝因為稟性較溫馴，我不但可以親手摸，仲可以用魚仔餵佢哋，感覺好似摸緊狗仔，真係好想拖佢哋返屋企呀！餵魚仔時佢哋又會好笨拙咁跟住你走，又會爭食，真係好可愛同搞笑！」

其後她探訪稟性較惡的皇帝企鵝，只能隔着玻璃觀賞，心情大靚的Zoie不時撩企鵝傾偈，又讚牠們頸部黃色羽毛漂亮，可是企鵝總是「一碌木」懶理她，難得Zoie仍死心不息說：「企鵝企鵝，我係咪好叻呀？」怎料企鵝竟醒目地起勢擰頭，令Zoie慘「食檸檬」，場面搞笑！

文：影視組