阿倫杜麗莎暫緩「飛債」得救！
譚詠麟（阿倫）、杜麗莎（Teresa）惺惺相惜逾廿載，苦等16年再度合作舉行紅館演唱會，在阿倫眼中曾被封為「惡婆」的Teresa，卻是千依百順的小女人，Teresa則大讚阿倫溫柔體貼，曾當眾餵她食蝦餃；對於演唱會宣布加開兩場，兩人大聲喊「得救」，因終可暫緩「飛債」之苦。
阿倫、Teresa將於7月20日起假紅館舉行四場《譚詠麟 杜麗莎Time After Time演唱會》，由於兩位殿堂級歌手首度攜手開騷，即掀起全城撲飛熱潮，結果在主辦單位的努力下，終成功加開24、25日兩場，阿倫、Teresa日前聞加場消息後，頓有如釋重負之感，阿倫說：「太好啦，我有啲做生意嘅朋友真係癲o架，本來佢只係訂咗45張，點知睇完我同Teresa喺無綫嘅音樂騷後，即再加飛要訂夠160張，我邊有咁多飛呀？我叫佢訂明年或者後年啲飛啦。」Teresa亦言感同身受，皆因不斷有朋友來電訂飛，可惜她手上頭只搶到4張飛留給至親。
親自為拍檔平反
有傳Teresa性格霸道兼聲大夾惡，問阿倫可擔心被Teresa「兇」？阿倫直言要為Teresa平反，和Teresa為演唱會綵排及錄音期間，從沒遇過她發脾氣，他大讚：「佢好好，我有乜提議，佢都OK，可能佢要求太高，說話又直腸直肚，所以佢先畀人誤會。」Teresa則說形象惡，全因擔任無綫節目《超級巨聲2》評判時被人「擺上枱」所致：「我有乜講乜，只係有人唔播我讚啲參賽者，淨係播我批評人，有人同我講因為呢個係show，要有娛樂性，（即係擺你上枱？）我冇所謂。」
餵食蝦餃好感動
Teresa稱和阿倫合作很開心，最令她感動是阿倫親手餵她食蝦餃：「嗰日我忙化妝整頭，瞌埋咗雙眼，阿倫大聲同我講：『你擘開個口呀！』我咪擘囉，原來佢餵我食蝦餃，怕我肚餓，除咗老公外，阿倫係第二個餵我食嘢嘅男人，佢亦是我等咗16年嘅男人，我哋上次合作拍電影，我做佢家姐。」阿倫則指餵食是舉手之勞，皆因覺得蝦餃凍了就不好食，故要趁蝦餃皮未變硬前，要先食落肚。
文：音樂組