蒙嘉慧呂慧儀藐爆蒲場「食家」

阿芝、YoYo及長腳蟹一圍埋即雞啄唔斷，不負無綫節目名《三個女人一個墟》之名，做慣DJ的阿芝當然口若懸河，而首次做主持的YoYo笑言可爆發多嘢講的「潛能」，更不會收口，連累監製笑言預咗被罰錢！至於阿蟹表示可增廣見聞，更可打正旗號向嘉賓整容醫生「問料」。

提到最難忘一集，阿芝表示是討論夜蒲，十年前是蒲精的YoYo踢爆阿芝扮專家其實「得個殼」，YoYo說：「阿芝話入場要蓋兔仔印，佢去啲咩場呀？佢表面好盡，其實係婆仔！我就唔煙唔酒，但鍾意去蒲場睇眾生相。」

蒙嘉慧早年是蒲精一名，她自言到夜店的目的是觀察眾生相。	「長腳蟹」呂慧儀希望世界末日是同老公一齊過。	卓韻芝認為緣分無分地方，蒲場一樣可以有真愛。

提到節目中有男蒲友自認「食家」，三人讚他夠坦率，但做朋友則「咪搞」，阿蟹說：「大家都藐爆，我唔Buy呢啲人！」問到是否相信蒲場有真愛？經常被拍到夜蒲的阿芝大表認同：「緣分係冇分地方！」相反YoYo及阿蟹則認為機會甚微。

Casual行婚禮

阿芝大爆三人雖好傾，但其實非常唔夾：「有集主題係世紀婚禮，我哋啲衫撞到飛起，阿蟹着婚紗，YoYo着黑紗牛仔褲，我就鍋釘衫，我第日結婚都咁Punk架喇！」YoYo笑言不介意Casual行婚禮，但低調的她拒絕透露何時嫁男友鄭伊健。此外，阿芝近月發起末日前的連串計劃，她笑言最想唱歌及去一妻多夫的地方。

文：立影

攝：林蔚恩