宋慧喬孭40萬手袋踢拖行商場

韓劇女神宋慧喬近日秘密來港，前日她趁機到中環行街。素顏的喬妹穿短褲踢拖大晒粗髀，女神即時降呢變師奶，但幸好孭了約40萬手袋挽回高貴形象！

現年30歲的宋慧喬，當年憑韓劇《藍色生死戀》迷倒不少男粉絲，近年更不時與港星合作。雖然近日喬妹在廣州趕拍與梁朝偉合演的新片《一代宗師》，但日前她已秘密來港拍廣告，將於香港逗留數天。前日難得不用開工，她即趁機前往中環行街「濕平」。

左揀右揀頻頻試戴

當日下午約五時，喬妹一身師奶打扮現身中環的商場，戴上黑超遮素顏的她，踢拖兼以短褲上陣，大晒粗髀，但卻手持約40萬的紅色鱷魚皮手袋。她於數名工作人員貼身護駕下，前往該處百貨公司閒逛。喬妹甫入店表現興奮，第一時間揀手袋及鞋，但左睇右睇都不合心水，轉頭又去挑選首飾及靚錶，還頻頻拿起飾物與同行的工作人員研究。