秋官埋怨激咀 邵美琪：下次借位囉
鄭少秋與邵美琪於新劇中有激咀戲份，雖然兩人演戲經驗相當豐富，但秋官坦言相當抗拒，忐忑之餘，事後都要向太太備案，而邵美琪同表示尷尬，更說：「如果唔鍾意下次借位囉！」
鄭少秋、邵美琪、陳豪、陳茵媺等昨日出席劇集《心戰》宣傳活動，期間播放劇中秋官與邵美琪的咀戲片段，秋官對於與邵美琪親熱，坦言有點抗拒，但都要做足演員本份，有向太太備案。秋官謂：「都講過唔得，我係唔鍾意，有太太唔係幾好，但監製好認真，我都負番做演員責任。」
唔使同男友備案
秋官坦言該場咀戲比以往的都要激，擔心觀眾不接受，他笑言：「直頭法國式，我哋係情人，都行夫妻之禮，我一直都抗拒唔拍，依家都有啲忐忑，（擔心老婆忐忑？）唔係，自己少拍，老婆好大方，佢知我做戲！」秋官表示拍這場戲沒NG，很快便拍完，又指邵美琪很專業，很快便把他帶入戲。
邵美琪笑言已想咀秋官好耐，她打趣謂：「戲又唔夠佢嚟！對白又唔夠佢勁，唯有靠咁溝通。（好回味？）佢好好，好有經驗，令我好快入戲，大家安心去做，（使唔使同男友備案？）唔使，始終係工作，如果唔鍾意下次借位囉！其實自己都幾尷尬，幾熟都係。」
情侶檔亦感尷尬
說到情侶檔拍親熱戲份不會尷尬，邵美琪坦言同樣會尷尬，又指與陳茵媺傾過，對方都不太接受，因為將真實放入戲劇，觀眾不會相信，最好工作跟私人事分開。
此外，對於有指23歲女藝員被人侵犯事件，邵美琪指通常涉案男子都否認，不過現時都只是單方面講，並未有證據。
文：影視組