薛凱琪：唔恨嫁有錢人
三十有一的「盛女」薛凱琪覺得結婚是遙遠的事，事業型的她由細到大都不愛靠男人，從來不覺得女人使男人錢是奉旨，她不會為嫁到個有錢人而驕傲，她願意做個平凡人的妻子，跟老公共同分擔。
以前細個會諗30歲都未結婚生仔：「嘩！唔係啩？死得啦！」到25歲就覺得不能太快結婚，因為我22歲太遲入行，仲有好多歌想唱，好多電影想拍，如果太早結婚，我又未儲到錢，我爹哋媽咪點算呢？我唔想靠老公，因為照顧爹哋媽咪是我的責任，應該由我承擔。如果能夠儲筆錢給他們養老，我會覺得驕傲，如果嫁了個有錢人，他畀筆錢我父母養老，我沒有甚麼好驕傲，不會驕傲自己嫁到個有錢人。
ＡＡ制唔寒酸
我不會靠男人，如果老公畀錢養我，我會認為佢好好，但不會覺得是奉旨。好多女仔拍拖時，食飯、旅行、買東西都係男仔畀，除非男仔好有錢，否則一個打工仔，月入兩萬元又點變做四萬呢？我覺得ＡＡ制不代表寒酸，邊個賺得多或者畀多少少，這與性別無關，我鍾意平等。
我屬於事業型，將來結婚相信都會繼續工作，除非老公不鍾意我做，但要有一個合理原因，不能因為自私的需要。今日的我覺得結婚太遠了，目前我唔覺得自己會嫁畀一個好有錢的人，我亦不認識甚麼富豪，只想嫁畀一個平凡人，亦不期望他可以養活我屋企人，因為無端端養多三個人喎，我仲有三隻貓一隻狗，所以婚後相信我還是要工作，事實上我都愛我的工作，如果因為嫁到個有錢人而不做，即過去８年我工作純粹為錢？事實上並非如此。
想領養小朋友
我本身好鍾意小朋友，但要擁有自己的小朋友責任好大，要同老公肯定有經濟能力負擔得起，畀到小朋友最好的一切，仲要個老公真的好好先會生。我生又得不生都得，如果老公肯，我亦不介意領養，最理想是生一個領養一個，只要有愛領養小朋友都是一樣。
口述：薛凱琪 筆錄：音樂組