江若琳咬青雲鹹情脈脈
劉青雲、江若琳（Elanne）及萬綺雯前晚出席新片首映，一直傾慕青雲的Elanne，有幸在戲中咬這位心目中的好男人，箇中味道，卻由含情脈脈變作「鹹」情脈脈。
劉青雲、江若琳、萬綺雯、傅嘉莉、盧惠光等前晚出席寰宇新片《追凶》首映，歌手陳柏宇拖女友符曉薇到場，相反，青雲則收起太太郭藹明，安排她先進場，未有讓她亮相台前，青雲說：「太太有來睇戲，佢怕怕地睇鬼戲，但呢套唔係鬼，係恐怖，彭發（導演）搵到童話呢個point，好有鬼才。遲啲會同彭氏兄弟合作新戲，關於拯救題材嘅災難片。（唔驚同謝霆鋒新片撞題材？）唔驚，市場咁大。（鋒芝傳復合？）好事，一家團聚，呢啲留番佢哋自己決定啦！」
陷火海買定保險
Elanne則表示在《追》片中發狂大咬青雲，她說：「我第一次同青雲合作，不嬲鍾意佢，人哋問我點至算好男人，我都答『劉青雲』，不過今次得一場對手戲，仲要咬佢手臂，起初驚，要借位，青雲叫我放膽咬。（味道點？）鹹鹹地，可能天氣熱。我仲有場火海戲，好危險，阿媽一早幫我買晒保險，但呢次我演自閉，拍到喊。（驚似薛凱琪有情緒病？）唔驚，我唔知有冇得買呢種保險，但我由細到大都黐黐地，阿媽好放心。」
文：影視組