幫媽咪拍比堅尼寫真 婷婷娜姐玩大母親節
細路仔都識唱：「世上只有媽媽好！」母親節快將來臨，為了令媽媽留下深刻印象，一班藝人名人絞盡腦汁想出最天馬行空的慶祝活動，藉以獻給最偉大的媽媽。當中謝婷婷、周秀娜、周汶錡三位名模就不約而同想安排媽咪於母親節當日穿上比堅尼，令保守的媽媽們來個大解放，騷身材之餘又可以拍照留下美麗回憶；而莊思敏就最鬼馬，想帶媽咪上太空兼在星球生活！
《時裝品牌派對》
謝婷婷「安排舉家去旅行，兩個姪仔梗係有份，仲帶埋攝影師去，影全家福之餘，仲幫我同媽咪影輯比堅尼相，母女裝上陣，我諗幾得意，又有紀念性。」
周汶錡母女三點式「帶媽咪去享受陽光與海灘，我會買定件比堅尼畀佢，齊齊着，因為我從未見過媽咪着三點式，佢好保守。」
熊黛林安排父母影婚照「想媽咪同爹哋影一輯婚紗相，因為喺佢哋個年代唔興影婚紗相，只得一張簡單結婚照，一次過慶祝母親及父親節呀！」
《廣告拍攝》
周秀娜「我未睇過媽咪着比堅尼，我想幫佢設計一件，而爹哋就着泳褲，由我親自操刀幫佢哋影輯靚相。」
《時裝騷》
Jocelyn送美容套餐「每年一定會送花畀媽咪，又會送美容套餐畀媽咪及外婆，等佢哋可以做facial同按摩，6月我都會返夏威夷探佢哋。」
汪詩詩恨影全家福「想喺母親節影全家福，對上一次同囝囝影，佢得6個月大，今次想大家着得fashionable啲再影過，或者着晒皮褸影。」
《Cafe分店開幕》
Angelababy深海探秘「我好想同媽咪去深海旅行，潛入深海揭開神秘面紗，據知深海好多生物都未被發現，我都係睇國家地理頻道先知道。」
《Fratelli Rossetti新店開幕酒會》
莊思敏帶阿媽上太空「我想帶媽咪上太空，因為夠晒刺激，喺地球以外嘅星球同媽咪一齊過，感覺好正！」
諸葛紫岐打造麵包超人媽咪「想開個麵包超人派對畀媽咪，所有人都着麵包超人嘅衫，我同媽咪都要着，我諗媽咪會鍾意。」
王大業 「book定間房同媽咪慶祝，仲會成間房連梳化都鋪晒皮草，始終屋企做皮草生意，皮草養大我，所以我諗媽咪對皮草都好有感情，希望佢唔會厭啦！」