莊恩敏試過斷背：還是男人最好
黃耀明大膽直認「出櫃」，名模莊思敏跟區文詩（Angela）Girl Talk時，她驚爆曾與五個Tom Boy斷背，最後還是覺得男人才是一生一世的伴侶，Angela亦自言曾暗戀同性，但想到要跟女仔做愛，即刻撲熄愛火。
A： 區文詩 莊： 莊思敏
洋漢體貼定要一試
A：我哋第一次見係model公司周年晚宴，嗰時我同緊鈴木仁一齊，我以女朋友身份出席，我一直好留意你啲新聞，覺得你好烈女，我都係口不擇言嘅人，我哋咁啱都係女校出嚟，我覺得讀女校嘅人敢言啲，好似G.E.M.（鄧紫棋）、阿嬌（鍾欣桐）。
莊：可能大家都係唔怕死嗰類人，乜都夠膽講，依家啲人好鬼假，扮晒唔講是非唔回應，我同你就乜都會講，私下仲會講啲好貼身好深入嘅話題。
A：係呀，我成日sell外國男仔畀你，好嘢嚟，如果人生未試過，應該試一次，試咗返唔到轉頭，外國男仔浪漫體貼，真係女仔行先，但又唔係港男嗰種冇主見、怕醜懦弱，佢哋gentleman得嚟又保護到你，同埋又夠高大。
拍拖生活必需品
莊：高對我唔係一個條件，反而溝通緊要啲，我覺得同外國人文化唔同，大家對將來睇法唔一樣，所以做朋友OK，做情侶就未必啱我。
A：你依家會唔會勁想拍拖呢？
莊：想架，成日覺得某程度拍拖係生活必需品，有佢開心好多，做嘢原動力都大啲，同埋我係多嘢講嘅人，收工要同人傾訴，依家唔知同邊個講，唔覺有人追！
A：之前嗰個（林忠豪）係霧水？
莊：佢諗多咗，哈哈，依家OK，可以做番朋友。
A：你自從（跟吳浩康）散咗之後，無論髮型呀、性格呀都愈嚟愈「仔」，更加難！
莊：係呀，依家啲friend懷疑我鍾意女仔，直情問我會唔會追女仔。
同性之愛難啟齒
A：咁你性取向有冇轉變？
莊：暫時唔清楚，哈哈。
A：讀過女校係易啲噃。
莊（爽快地）：我以前都有試過同女仔一齊架，讀完書都keep住好長時間，先後有五個，所以啲friend覺得我會返轉頭。
A（碌大眼）：真係架？咁你係「仔」定「女」？
莊：我係「女」，五個都係TB（Tom Boy），我都唔想拍咁多次拖，好坎坷！
A（自招）：我都有試過鍾意女仔，讀女校好易架，不期然會仰慕學姐，曾經阿嬌都係我哋學校風頭躉，好多同學喺走廊瞄佢。入行後，我真係暗戀一個TB，不過我制止自己冇去開始，因為我幻想到如果要女仔同女仔（做愛）呢，我唔得架！我都好奇問啲TB朋友，係點架？
莊（欲言又止）：會做啲乜？好難解釋嘅噃，其實差唔多之嘛。
A：男同女感覺唔同？
莊（尷尬地）：有啲分別嘅，但好難話邊樣好啲，冇絕對。
一生一世依傍男人
A：咁你依家對女仔仲有冇幻想？
莊：依家又冇喎，雖然女仔會比較了解我，或者多啲關心動作，但我同男仔一齊之後，發現原來去到一生一世要搵個依傍，真係要男仔，我第一個男朋友係阿Deep（吳浩康）。
A：佢就正啦，益咗佢，哈哈……咁佢有冇介意過你曾經係同性戀？
莊：有嘅，但改變唔到，我又唔會選擇去隱瞞。
A：我聽人講只要你曾經同女人一齊，好難返轉頭，因為女仔擁有男人嘅man，但又有女人嘅細心。
開盤搵仔重溝通
莊：睇人啫，都有啲花心嘅TB，當然佢哋嘅溫柔係一般男仔難做到。
A：咁你依家開嘅盤係乜呢？想要啲咩嘅仔？
莊：最緊要溝通到，佢要明白我工作。
A：係咪以前嗰啲溝通唔到？
莊：都係架，去到某一個位摩擦就會大，大家諗嘢好唔同，可能大家喺呢行開始層次唔同，Deep入行好被保護，我由model開始做起，接觸範疇同人都比較多，大家方向或睇一件事諗法好唔同。
A：係咪完全冇復合可能？
莊：冇囉！
A：因為佢依家太肥？
莊：哈哈哈，關乜事，我唔介意外表，靚係bonus。
扮鵪鶉添女人味
A：我有啲friend專登揀唔靚，話有安全感啲。
莊：唔一定架，我見過無數嘅唔靚仔不停溝女，要搵啲玩咗好多年嘅靚仔，所以冇一定。
A：你相識滿天下，半個香港男仔識晒，已經冇選擇，你性格又爽，畀人覺得好「兄弟」。
莊：係呀，我都驚，有啲新friend覺得佢幾有潛質，但第二次見已經同我上契做兄弟，好慘！所以身邊啲friend開始想改造我，逼我留番長髮，唔好一出嚟「B呢巴啦」，叫我鵪鶉啲，我話唔得喎，平時見到呢啲女想摑佢。
後記：唔拆彈怕皺皮
莊思敏唔止膽敢認斷背，還承認曾隆胸割雙眼皮，果然是Angela口中的烈女，「微波」的Angela好奇追問莊思敏點解咁做？如果下任男友唔鍾意，會否「拆彈」？莊思敏坦言唔肯：「我怕一脹一縮，易皺皮。」Angela聽到即拍掌大笑，坦言自己冇興趣隆胸。
文：音樂組
攝影：劉智源
場地：N.C. Grill Restaurant & Bar
區文詩髮型：Sue Cheung@Hair Corner
化妝：Shirley Lee