陳敏之唔吼森美處男之吻
陳敏之昨日在旺角街頭拍劇大騷長腿纖腰，吸引不少途人駐足觀看，不過拍檔森美直言不被吸引，更搞笑地指她似自己阿媽。問到敏之會否想奪去電視劇初哥森美的「處男之吻」？敏之笑說：「我唔想要喎！」足證飾演情侶的兩人唔過電。
陳敏之昨早露小蠻腰、騷長腿拍新劇《法網狙擊》，扮演臥底女警放蛇扮妓女，打扮與早前在劇集中飾演性工作者差不多，但敏之不怕被定型：「演戲啫，好似『索腿天后』翻生咁。」
「好兄弟太麻甩」
劇中敏之與拍劇初哥森美飾演一對，可有想過奪取森美的「處男之吻」？她開玩笑說：「我唔想要喎！」森美反而不介意為敏之獻吻：「總之唔係小儀就得啦，我第一次嘅電影銀幕初吻係畀鄧麗欣架，都係靚女！（有冇畀敏之嘅長腿迷倒？）佢吸引咗好多麻甩佬圍觀，不過我鍾意啲短腳嘅。敏之好似我阿媽咁，佢係我好兄弟、好前輩，佢個人太麻甩，不過好照顧我架。」似乎先為緋聞落閘，務求令大家的另一半都放心。
想正面全裸上陣
敏之在劇中有街頭狂奔戲，她試過拍攝類似戲份仆倒撞斷鎖骨要休養一段時間，不過敏之直言沒有留陰影：「因為今次畀起上次輕鬆好多，唔使咁劇烈，加上着波鞋跑安心好多！」她與森美在劇中是鬥氣冤家，敏之踢爆森美有場被扯甩褲露出孖煙囱的戲，森美打趣說：「我想全裸添呀。（替身？）親身上陣，正面全裸，不過唔知監製畀唔畀喎。」而劇中演森美下屬的陳志健昨早亦在場拍攝，對於他在《拳王》的角色頗受好評，出街有人直呼其角色名字「阿力」，令他感到高興，鄭嘉穎在同劇被指性格有缺陷，陳志健力撐嘉穎：「可能佢又要打又要做文戲，消耗好多體力又唔夠時間抖啫，佢好好人架！」
文：影視組