古天樂遭短裙女生擒
藝人被粉絲追捧不是新鮮事，但古天樂（古仔）前晚出席活動時，竟被一名短裙女撲前突襲，不但翹實他不放，還挨身挨勢讓同行友人影「合照」，令古仔一度呆立當場，最終要出動保安將她拉走，可憐古仔當場失守被擒！
古天樂前晚出席Jimmy Choo開幕酒會，進場之際突然被一穿短裙女子撲上前翹實手臂兼挨身挨勢，該女的同行友人則在旁得戚拍照，令古仔一度反應不及，定神後才懂得尷尬迴避，最終更要勞煩保安將女子帶走。事後問古仔是否經常被女撲？他驚魂未定：「吓？真係唔知點反應！有次去北京做宣傳，有兩個陌生女仔好熱情咁叫我個名，我都即刻衝上車，佢兩個好靚o架，我上到車先諗點解自己咁嘅反應？可能工作上接觸好多人，搞到怕陌生人。（驚惹緋聞？）唔係，會驚囉，如果唔太熱情搵我合照都OK。」他又透露在韓國和外國都分別試過有男性對他很熱情，自言不知何解自己會男女通殺！
Lynn斥不道德交易
同場的名模熊黛林（Lynn）對有女星以性交易來換取演出機會，直斥行為不當，又表示曾被邀出席飯局：「成日會有，Kim（經理人）初初會鬧黐線，後來都唔使同我講直接推晒，女明星嘅名聲好重要！」Lynn還自爆試過有冒牌速遞員上門給她一封信，信內寫明有工作一日可賺一百萬元，她心知是不道德交易，後來愈想愈害怕，為何速遞員會有密碼上門送信？最終決定報警求助以保安全。
Baby哼曉明主題曲
另外，Angelababy就表示今年不會出寫真集：「都出過三本啦，（黃曉明唔畀性感？）唔一定好性感，畀多五、六年時間我，等我成熟啲先，依家有興趣出碟多啲。」至於會否跟曉明合唱？她即搞笑地哼出對方主演的《新上海灘》主題曲。而是晚出席嘉賓眾多，其中名模馬詩慧以透視裙亮相，與拋胸上陣的薛芷倫成為性感之最。
文：名人組