李蘊爆癲料着睡衣行超市

歌手李蘊（Renee）芳齡20，正是芳華正茂、有大量青春燃燒之時，鬼主意多多的她表示與同齡好友G.E.M.最投契，不時玩到癲互相整蠱，她說：「佢一個人住會悶，所以我成日去佢屋企，我哋同年又相同星座，性格好似，都係大癲大廢！」

年過20有隱憂

提到最爆一件事，Renee表示兩人忽發奇想，齊齊穿睡衣及高跟鞋到超市掃貨，更互相拍照留念，嚇壞街坊！她說：「玩遊戲罰嗰啲仲癲呀！有拍片但唔可以公開，嚇死人架！」提到兩人均對台灣情有獨鍾，問到會否結伴同遊？Renee說：「都想同G.E.M.去旅行，但唔會去台灣，呢個地方咁敏感！」

李蘊（左）與G.E.M.同齡又相同星座，兩人玩得好癲。

李蘊望事業有突破，欲試演人母、辣妹角色。

不過，Renee直言人過20開始有「隱憂」，就是新陳代謝減慢，令她變得易肥：「原來20歲真係一個關口，我唔係食好多嘢，不過一食就見效，尤其係塊面！」所以她不敢放肆狂食，幸好忍口有價值，早前她破格穿內衣行騷盡顯纖瘦身段，獲網友激讚Fit爆！

想演阿媽角色

形象青春活潑的她亦希望變成熟，事業有新突破，她說：「唱歌嗰陣可以繼續sell可愛，但拍戲就試唔同嘅嘢，以前做過好多次學生妹，希望嚟緊做殘障或勁潑辣嘅角色，總之要同真人好唔同！」她更笑言可嘗試扮演30歲的人母角色，但未知有否導演具此膽量用她。

攝影：黎志輝

場地：日航酒店桃李中菜廳

文：立影