莊思敏最嬲:買狗唔照顧

莊思敏(Jacquelin)與一對孖妹莊思華(Mona)及莊思明(Lisa)亦師亦友,雖然於日常生活中,她們不時為雞毛蒜皮的小事而吵架,但遇上大事如早前Mona捲入襲擊案,Jacquelin則絕對信任她,並給予支持及鼓勵,擔當如母親的角色。

其實我哋三姐妹冇話好分家姐細妹,反而好似朋友,乜嘢都會講。我又唔會因為我嘅身份刻意鬧或者管住佢哋,最緊要同佢哋熟。我哋成日會為好小事而嗌交,好似佢哋不問自取拎咗我啲鞋去着、架車去揸,又或者霸住部電視機,我哋就可以嗌交o架啦,不過冇隔夜仇嘅。

家有十犬未夠喉

我最嬲係佢兩個都好鍾意狗,有陣時行街見到鍾意就會買,但係企屋已經有十隻狗啦!佢哋又唔係真係有時間照顧,好多時都係畀工人湊,但佢哋就覺得「橫掂都有人照顧就得」,真係激死我!又話極都唔聽!

擔心孖妹畀人蝦

其實我大佢哋七年,而且又早出嚟做嘢,見嘅嘢比佢哋多。加上依家得番我哋三姊妹喺香港,我就會兼任埋媽媽嘅角色去照顧佢哋,真係會擔心佢哋會畀人蝦。好似上次Mona涉入一宗襲擊案,仲搞到上警局。其實我聽到呢個消息嗰陣,又唔係好驚嘅,反而好想知道發生咩事。因為我好相信阿妹唔會做出過分嘅行為,但我最想聽佢講一次件事。發生咁大件事,我唔會去話佢,反而係想令佢冷靜啲先,因為我知道佢都好驚、好不安。等佢知道無論點,我都會相信佢同支持佢。(完)

後記:不厭其煩胸襟廣

莊思敏出名口直心快、今次訪問亦不例外,有問必答,但原來她的包容量也非常高!話說這次訪問的大綱一改再改,小記致電她補問多達三、四次,實在感到不好意思,但她卻非常友善反安慰說:「唔緊要,最緊要做好篇訪問!」即使她工作繁重,亦犧牲珍貴的休息時間,耐心回答所有問題,令小記非常感動!

口述:莊思敏 筆錄:名人組