買A貨當玩？祖兒斥GaGa影響港形象
美國百變天后Lady GaGa日前於twitter留言在港購買A貨，前晚她開騷時自爆被香港海關執法人員調查，此事惹起廣泛討論，容祖兒昨日出席活動時直言GaGa此舉影響香港形象，且笑言GaGa身家豐厚，買A貨應該係貪玩。
Lady GaGa前晚開騷重提在港買A貨事件，且自爆遭香港海關執法人員直踩酒店調查，GaGa雖然辯稱講笑，但事件已引起廣泛回響。天后容祖兒昨日出席OSIM活動時，被問到GaGa疑購A貨可會覺得有損香港購物天堂的美譽？祖兒說：「當然，GaGa咁多fans，講每句說話影響都好大。（佢話係講笑？）咁應該係講笑，知道自己唔可以亂噏，如果佢咁多錢都要買A貨應該係貪玩。」祖兒謂曾於澳洲欣賞其演出，故今次沒有特別撲飛，亦不會欣賞其個唱。
阿Sa接「警告信」
而蔡卓妍（阿Sa）昨日到電台受訪時，對此事謂：「使乜買（A貨）？佢乜都有，仲有私人飛機，可能講笑，香港係購物天堂，乜都有得買。」問到可有誤購或試過買A貨？阿Sa直言：「試過有件Tee係朋友再設計，將個品牌logo改少少，再加自己元素，之後嗰間公司寄封信畀我，話我去買嘢有折，但就冇追究。」
名模琦琦昨日接受電話訪問，她謂A貨全世界都有：「其實美國都有好多，當地名店門外已有A貨賣，五十步笑百步啫，佢都話係講笑。」鄭欣宜舊愛Mark Ryan亦言前晚有欣賞GaGa個唱，他承認GaGa於台上說買老翻：「佢喺台上自爆有海關人員向佢接觸，GaGa話喺香港就一定要買老翻。（覺得佢鼓勵買老翻？）覺得佢咁講唔係存心呼籲大家要買老翻，只係想搞氣氛，講笑。」
據了解，海關人員到酒店向GaGa查問時，GaGa並沒有出示宣稱購買的A貨手袋，亦沒有回應於哪裏購買，故不可確定是否有買A貨名牌手袋，亦無法驗真偽，至於該名牌手袋方面亦沒有因此事而投訴。據知，因GaGa名氣大，故海關商標調查組於中環巡視有否假貨出售，但沒有任何發現。
巫婆look玩親民
此外，GaGa昨午2時30分出發到亞洲博覽館，並以巫婆look現身，但原來此造型先前已出現過，問到為何海關聯絡她？她沒有回應，只笑着揮手，並走向粉絲身邊說「I Love You」，簽名、合照亦有求必應，相當親民。而GaGa出發前已有保安向記者表示不要跟車，免生意外。
文：音樂組