陳逸璇今嫁墨西哥Marc哥
前歌手兼曾是Angelababy師妹的陳逸璇（Jolie），於今日與拍拖三年半的墨西哥男友Marc拉埋天窗，早前二人到了墨西哥拍攝婚照，而此行令她十分難忘。
Jolie與Marc到了墨西哥城及著名景點影相，因當地人沒有拍婚照的觀念，他們所到之處吸引大批群眾圍觀，還鬧出不少笑話，Jolie笑言：「當地人每到16歲都要舉行一個大型派對，啲人見我着得咁靚，加上佢哋唔識睇亞洲人嘅年齡，以為我好細個，問我係咪為16歲生日影相，後來知道係為結婚影相，佢哋好熱情咁不停拍手，又叫我哋Kiss。」
登金字塔被阻
不過有開心亦有阻滯，她說：「我哋去到金字塔影相時遭到阻撓，因為我攞住一條白色長裙，保安以為我哋係幫雜誌影相，唔畀我哋上金字塔，要我哋申請許可證，最後我惟有唔帶嗰條裙上去，先成功過關。」不過，最有趣是二人影相時遇上街頭樂隊演奏，Jolie即興與他們表演Jazz，音樂果然無分國界。
公幹因利乘便
Jolie透露此行計劃倉卒，因外國沒有拍攝婚照的習慣，男友對此難以接受，後來Jolie在家中做了一場小型時裝騷給男友看，才成功說服對方，當時適逢Marc要到墨西哥公幹，故因利乘便在當地拍婚照，但Jolie沒有穿着婚紗拍攝，她解釋：「因為外國人認為新郎在行禮前見到新娘着婚紗係唔吉利，所以婚照只着晚裝。全個過程只有三日時間籌備，要搵晚裝、頭飾、鞋、攝影師同地點，好在得到好多朋友幫忙。」
Jolie透露她於5月2日（今日）先在港註冊，之後飛往峇里行禮，再分別在墨西哥及香港擺酒。Jolie稱二人拍拖三年半以來，到了28個地方旅行，而峇里正是他們首次旅遊的地點，分外有紀念價值。
文：名人組