楊梓瑤遭狠插 克勤哭波喪
「浸大E神」楊梓瑤（Carol）為支持曼城擊敗曼聯，未開波前力撐愛隊好波，卻被「紅魔」fans辱罵八婆，氣得Carol扯火鬧對方冇品！而「紅魔」球迷李克勤做老竇後好日唔睇波，一睇愛隊就輸波，不禁令他哭波喪。
昨日凌晨曼城主場以1比0小勝「死敵」曼聯，更以得失球反超前曼聯成為英超榜首隊伍。身為曼城死硬粉絲的Carol通宵睇直播支持愛隊，更於微博留言預祝「曼城好波」，怎料有內地「紅魔」粉絲竟回應Carol叫她「吃屎」，還稱她為「八婆」，氣得她即時在微博還拖：「你們沒事嗎，我不能有自己支持和喜歡的球隊嗎？我就是支持曼城！那又怎樣！趕快取消我關注，我沒有這麼沒有品的粉絲！」對過火粉絲實行下「逐客令」。
怒斥留言者冇品
記者昨致電Carol，她對被辱罵一事仍感勞氣：「睇完段留言真係唔開心，唔使咁寫呀？我又冇鬧佢哋隊波，唔Buy我睇法唔緊要，但惡意中傷真係好冇品！」她強調文化各有差異，應尊重他人的觀點。
另一邊廂，身為「紅魔」fans的周秀娜和李克勤卻各自為愛隊輸波哭波喪！昨日身在天津的娜姐在長途電話訪問中說：「真係好慘！因為我要趕去天津，咪叫男友Avis幫我買少少支持紅魔囉，點知佢又再買多啲，搞到搭沉船，我唔理呀，佢要賠番錢畀我！」而克勤昨出席nowTV歐洲國家盃活動時亦直言揼心失眠：「唔好提喇！有小朋友之後都好少睇直播，點知一睇就輸波！睇完都瞓唔着，諗住拎冠軍又未必係！」
自嘲冇錢請保鏢
提到最近出現拐子佬，克勤表示不少家長都較以前謹慎，並呼籲記者拍到囝囝照片後要打格：「好似日本AV女優咁，遮住嗰兩點（眼睛）！（請保鏢？）請唔起呀！」至於「網上23條」問題惹爭議，克勤接受不太過分的網上惡搞，但贊成有適量規管。
文：專案組