為盛女平反 莊思敏：港男太被動
被喻為「黃金盛女」的莊思敏誓要為一眾「盛女」進行大平反！她強調一眾單身女性，對於拍拖乃「不為也，非不能也」，絕不是大家口中的失敗者。她亦狠批現今的「宅男」過於被動及懦弱，女生不甘自降身價去與他們拍拖，亦無可厚非。
我覺得「盛女」同「剩女」嘅分別真係好大！我畀人話係「盛女」嘅話我就冇乜所謂，因為「盛女」係代表盛放、有條件、有錢、有自信、獨立，對愛情有自己睇法嘅女仔。我哋係自己揀去唔去拍拖，而唔係冇權、冇條件去拍拖，唔好標籤我哋為「冇人要」囉！
唔需要靚仔
人哋成日都話「三高」（學歷高、收入高、心頭高）嘅女仔好難搵男友，其實我學歷唔高，心頭都唔高。好多人都會問我對另一半嘅要求，老實講，我真係噏唔出。我唔需要佢高大、靚仔，又唔使佢過分有學識，又唔使佢搵好多錢，反而我需要嘅係一個好坦誠同埋溝通到嘅人。
無勇氣表白
睇《盛女愛作戰》，裏面提到要四十五度角同人傾偈、覆短訊一定要短過對方咁。如果樣樣都咁計算，咁愛情嘅意義就改變咗，反而變成一個遊戲，大家都只會諗點先可以「升呢」。我覺得愛情唔係一個倒模，如果有本愛情通識書，咁就唔會有人分手啦！我自己對住心儀嘅對象，盡量用最自然嘅一面對住佢，「醜婦終須見家翁」，最終都要畀佢知我真實性格，冇得扮。
我係一個唔會主動去追男仔嘅人，雖然話「女追男隔重紗」，但係我會好怕對方會覺得「送到上門就食囉」。如果男人連表白嘅勇氣都冇，咁就證明佢唔夠成熟啦！依家嘅香港男仔實在係太被動同懦弱啦，加上宅男愈來愈多，成日淨係識留喺屋企玩電腦，搞到市面上嘅男人更少！唔可以將一切嘅問題都歸咎於女仔要求高身上囉，男人都要好好檢討一下。
口述：莊思敏 筆錄：名人組