洪天明心痛定情袋被盜

新婚的藝員夫婦洪天明和周家蔚位於將軍澳馬游塘村三層高村屋愛巢，前日遭賊人入屋爆竊，損失金器、首飾、名貴手袋等物品約值十萬元。洪天明昨日接受電話訪問表示：「前日下午三點到九點屋企咁啱冇人，九點幾返到屋企發現畀人爆格，好彩老婆將啲貴重物品，好似之前結婚啲金器、龍鳳鈪放咗喺保險箱。唔見咗係玩Game Show贏番嚟嘅禮品，好似手錶、同埋生肖金飾擺設。」

欲加強保安

愛巢遭爆竊最令洪天明心痛是損失了兩份具紀念價值禮物，他表示：「第一樣係我喺拉斯維加斯買畀家蔚嘅第一份禮物，係一個Chanel手袋，價值萬幾蚊，佢都唔捨得用，好有紀念價值好心痛。仲有係細佬送畀我哋結婚嘅大型金器擺設，價值五位數。不過今次都慶幸當時冇人喺屋企，人有損傷就唔好。」

洪天明及周家蔚新婚不久就遇上賊人入屋爆竊，認真不幸。（資料圖片）	二人愛巢的窗子被撬鬆。	屋內的露台可見有警察的膠帶。

周家蔚受訪時則慶幸婚戒和求婚戒指皆戴在手上，未有損失。而原本飼養在家的五頭迷李貴婦犬也剛巧遷到母親家中，否則愛犬遇上賊人，後果也不敢想像。周家蔚指受驚後夫婦昨晚也睡不安寧，正安排加強屋企保安，她表示：「今次嘅賊人好專業，只係啲窗畀人撬過，佢哋連衣帽間都摷過晒，我都唔見咗另一個Chanel手袋。因為屋苑新入伙，所以都未請得切保安，依家天明都諗緊點樣加強防盜保安。」

交警方處理

另外，洪天明前日凌晨在屋外接受訪問，指事件已交警方處理，正點算失物，至昨日他都未有外出。此外，警察公共關係科證實接獲馬游塘村姓洪的男子報案，現列作爆竊案處理，暫時未有人被捕。

採訪：影視組

攝影：追蹤組