莊思敏勸妹:唔好性感試衫

莊思敏(Jacquelin)早前榮升女裝時裝店老闆,看舖期間不時遇上各式各樣怪客。她就曾遇上一名怪客,以女友身形與她相若為由,要求她穿上性感衣飾並且拍照供他獨家鑑賞,事後她叮囑妹妹思華不可以親自為顧客試衫。

其實我唔係成日得閒返舖頭看舖,主要都係交畀妹妹莊思華(Mona)打理。佢有時會同我講,真係有啲fans會衝入舖頭話想搵我傾偈、影相,不過咁啱次次我都唔喺度。

獨自看舖危險

本來我都唔信架,直至有一次我同阿妹一齊看舖,有個男仔走入嚟睇衫。我梗係上前問佢想搵咩衫架啦!佢同我講想揀禮物畀女朋友,仲話女友身形同我差唔多,問我可唔可以試衫畀佢睇。我起初梗係冇乜所謂啦。不過愈來愈覺得唔對路,因為佢專揀啲性感嘅衫,而且後尾仲問我可唔可以影相。好彩嗰陣時有阿妹喺度幫我擋駕,佢先知難而退,當然係冇買到嘢添啦。不過經過呢件事,我突然覺得阿妹自己一個看舖都幾危險,仲千叮萬囑佢唔好試衫畀人睇!

壯女狂試窄衣

不過其實都有啲好開心嘅經驗架,有一個外國女仔好鍾意我哋啲衫,佢試咗一件,點知佢大隻得滯,拉極都拉唔埋拉鏈,都差成五、六吋。其實件衫都成八、九千蚊,不過佢真係好鍾意,仲話只要拉得埋、着到一次佢都會買嚟着。佢問咗我哋好多次,搞咗成十五分鐘,真係用盡方法想佢着得入件衫,但最後都失敗而回。雖然做唔成呢單生意,但係真係令我覺得好感動。

口述:莊思敏

筆錄:名人組

服裝、場地:TINSELTOWN