蔡恩真甩沈志明：我唔覺傷心
韓模蔡恩真（EJ）承認曾與台模「萬寧哥哥」沈志明拍拖，同是來港發展的二人因寂寞而結合，因了解而分手。EJ坦言與沈志明分手不覺傷心，因知道對方不適合她。情路上飽歷滄桑的EJ，對愛情仍充滿憧憬，希望找到一個痛錫她的好男人。
自食其力拒絕被包
EJ於1999年以女子組合CLEO打入韓國樂壇，四年前她毅然放棄歌手身份，來港當模特兒，一切由零開始。來港初期，她窮得連食飯錢也沒有，她仍力抗心魔，即使有富商主動邀請，亦堅拒被包養。
啱啱嚟香港嗰陣，當然完全冇工作，我就靠每星期公司畀嘅八百蚊零用錢過活。為咗慳錢，朝早食完早餐之後，就唔會再食嘢，直到夜晚九點，就去啲夜店嘅免費模特兒聚餐，又或者會搵經理人一齊食飯，因為佢一定會請客，所以喺食方面我使好少錢。同埋絕對唔會買名牌，要買都會揀啲平嘅牌子。其實我喺韓國嘅銀行戶口係仲有錢，不過我應承過自己，喺香港一定唔可以用韓國嘅錢，最後我成功咗。
其實無論喺韓國定香港，都曾經有唔少有錢人話想包養我，不過我統統都拒絕。試過有個有錢人約我食飯，見我用緊部手機，就問我：「都唔係touch screen，點解唔用iPhone？」點知第二次食飯，佢就買咗部iPhone送畀我。我當然唔肯收，不過都同佢講好多謝佢嘅心意，佢就話：「呢部iPhone幾時都會等你，想要嘅話就搵我啦。」不過之後就冇再聯絡啦。我依家只係想搵到一個好錫我嘅男仔，唔使有錢亦唔使靚仔，最緊要唔可以係Play Boy！
互相扶持 猶如家人
曾被拍得與台模沈志明激咀的EJ，承認與對方拍拖半年。離鄉別井的二人，分外明白人在異鄉的寂寞，故一直互相扶持。可惜最終仍因性格不合，令戀情無法開花結果。
我同佢係喺朋友聚會度識。其實我一開始唔係特別鍾意佢，亦唔覺得佢靚仔，淨係覺得佢好可愛。起初其實係冇乜講嘢，因為我唔識普通話，佢又唔係好識英文，好難溝通。後來佢學英文，我哋先開始熟落。嗰時佢唔知自己想要乜，我亦差唔多單身咗成年，好想有男朋友，所以我哋行得好埋。不過與其話係男女朋友，不如話似屋企人。
後來爆佢同o靚模Cammi（謝芷蕙）嘅緋聞，形象變差令工作量大跌，所以佢嗰排好唔開心、好抑鬱。可能因為我哋兩個都係離鄉別井，喺香港冇乜真心朋友，所以我就一直喺佢身邊支持佢、鼓勵佢，令我哋關係更加緊密。不過過咗一段好長嘅時間，佢都仲係完全冇改善，情緒依然十分低落，我覺得佢需要多啲時間去治愈。不過一定要靠佢自己，其他人想幫都幫唔到，所以決定畀啲空間佢，等佢諗清楚自己想要乜。自此之後，我哋就冇再見面同聯絡，我亦都唔覺得傷心或者可惜，因為我知道自己想搵邊種男仔，佢唔適合我。
曾戀賤男誤做小三
目前單身的EJ坦言自己曾是Play Girl，見過各式各樣的男人。對Play Boy已毫無興趣，當年決心來香港發展，全因曾被賤男所騙，才決心離開傷心地，重過新生。
我喺韓國嗰陣，曾經對一個男仔一見鍾情。明查暗訪之下，知佢嗰時有個拍咗六年拖嘅女朋友，所以我冇去識佢。一年之後再撞到佢，知道佢仲係同嗰個女仔一齊，我又放棄咗。點知再過半年之後，知道佢同女朋友分咗手，我就主動上前同佢講嘢，我哋就係咁開始約會，後尾仲拍拖。一齊嗰陣，有時有啲電話打畀佢，佢會好sweet咁叫對方做BB或者Honey，我覺得好奇怪，問佢係邊個，佢就話係同男仔朋友玩吓，我當然選擇咗信佢啦！後來佢叫我上佢屋企，入到去見到好多女仔嘅日用品，好似化妝品、衫等，我問點解，佢就話係前女友留低嘅，只係未搬走啲嘢。唔知點解，我嗰時又再相信佢。
直至有一日，我同男友出緊街嗰陣，有個女仔打畀我，好惡咁問：「你同我男友咩關係？」我嗰時乜都唔知，仲反問佢係邊位！佢話自己同我男友拍咗七年拖，佢先係正印女友！女仔突然出現，一拳打落我塊面度，我真係成個人瞓咗喺地下！男友唔單止冇幫我，仲話：「係佢黐埋嚟o架！我都話咗自己有女友，佢係壞女人！」我真係好傷心，都唔想再解釋！佢鍾意點諗就點諗，到依家我都仲好記得佢講嘅一言一語。
後悔認整容
擁34C逼爆上圍的EJ，從不隱瞞自己整容，但她亦曾為自己說出真相而感後悔：「喺我第一次接受香港媒體訪問時，佢哋問我有冇整容，起初我都覺得好愕然，喺韓國係唔會有人問你呢個問題，因為大家都覺得整容好平常。我嗰時好誠實咁答隆過胸、整高咗個鼻同割咗雙眼皮。點知個報道就剩係集中喺我整過容，話我係人造人等等，我嗰時真係好傷心。」
對韓國人而言，整容是自我增值的途徑之一。相比起明顯判若兩人、但仍堅持是瘦身或化妝效果的港模，EJ的勇氣及真誠值得讚賞。
口述：蔡恩真
筆錄：龔凱欣
攝影：吳文聰
服飾：DOLCE & GABBANA @ I.T