姚樂怡洞房花燭一床係人

姚樂怡與老公吳俊匡前晚在Ritz Carlton舉行婚宴，由於愛玩的姊妹團成員湯盈盈四處灌酒，令她老公、父親及弟弟全部醉倒新婚套房內，「屍橫遍野」，並令樂怡錯失在新婚之夜「造人」良機。

姚樂怡與老公吳俊匡前晚在Ritz Carlton酒店筵開30席招呼親朋，在早上玩新娘環節已經「肆意行兇」虐待樂怡老公的姊妹湯盈盈，晚上繼續搞搞震。樂怡昨日接受電話訪問時，踢爆盈盈在婚宴內聯同其他姊妹四處搵人灌酒：「佢哋連我15歲嘅細佬都唔放過，係咁灌佢飲，我老公件白色踢死兔變咗紅色，佢哋唔係隊酒，簡直係倒酒！我老竇都醉咗。」

樂怡更百無禁忌笑言新婚套房「屍橫遍野」：「我老竇瞓喺梳化，我老公同細佬瞓咗喺張床度，仲要掉轉瞓（頭在床尾位置），搞到我都要掉轉瞓，如果唔係咪要聞臭腳。」樂怡亦因飲醉，沒有卸妝便瞓，白白錯過造人良機。