剖腹救B 陳自瑤誕6磅2龍女
無綫小花陳自瑤（YoYo）去年11月與藝員王浩信（Vincent）拉埋天窗，隨即宣布懷有身孕，原定預產期為下月中，但日前產檢時驚覺BB出現臍帶纏頸迹象，兩人為保BB安全即改變計劃轉為剖腹，幸最後有驚無險，YoYo昨日順利誕下6磅2安士「龍女」，母女平安。
無綫藝員陳自瑤及王浩信去年11月精心挑選在「8條1」好日子舉行婚禮，其後YoYo宣布懷孕並深居簡出迎接小生命，更狠推多個共7位數字酬勞的工作！一直希望自然分娩的YoYo，間中會到公園做簡單運動練氣，希望生BB時可更有力氣，不過日前她往產檢，驚覺BB出現臍帶纏頸迹象，令一對準父母大為擔心，但隨即聽從醫生的建議，盡快改以剖腹分娩以策安全。
四肢長眼大多髮
經玄學家李丞責擇日後，昨晨YoYo在Vincent的陪同下入產房，比預產期早了大半個月，幸最後手術順利，YoYo在昨晨九時多成功產女，6磅2安士的BB女雖不算重磅，但健康精靈，而YoYo休息數日亦可出院。
榮升爸爸的Vincent步出醫院時直言十分緊張，失眠至大天光，親自為女兒剪臍帶時更緊張手震。問到BB女似父母哪一個？Vincent笑晒口說：「兩個都似喎！眼大大、頭髮多多似媽咪，耳仔都似佢，四肢就手長腳長，呢樣似我！（會改咩名？）交畀李丞責師傅負責。」
初為人父的他直言感觸良多兼險落下男兒淚，但見證愛女出世則甚麼也值得：「感動到眼濕濕，喺產房一路拍住個過程，睇住個女出世，啲父愛即刻出晒嚟，老婆平時打針都驚，佢揸住我隻手全程都震緊，我就不斷鼓勵佢。（點獎勵老婆？）計劃送車，都方便個女第時返學。」
餵奶換片冇難度
問到可有打算再生BB？Vincent表示隨緣：「見到老婆好辛苦，自己都唔捨得，不過如果負擔到，我哋意願都想要多個小朋友！」近月Vincent都要開工，下月亦將拍新劇，但他笑言一直沒有疏於練習「湊女功」：「餵奶、換片呢啲基本功難唔到我，不過老婆就深究啲，佢會教番我！呢排我都忙，所以同監製講咗盡量畀時間我陪老婆同埋個女，希望多啲時間一齊。」
文：影視組
攝：李柏儒