靚靚保Chilam「型」象 有飯開
袁詠儀和老公張智霖昨日夫妻檔搵銀，靚靚坦言酬勞很好。她又大爆老公平日不太注重自己的衣着打扮，可以着睡覺衫出街，甚至一套衫着幾日。充當老公形象指導的靚靚笑言老公型她才有飯開，不用食自己嗰份，可以食老公嗰份。
袁詠儀（靚靚）和老公張智霖（Chilam）昨日以夫妻檔上陣，為化妝護膚品牌Lancome全新概念店擔任剪綵嘉賓，靚靚坦言這次酬勞很好。其他嘉賓還有周嘉玲、Alice B.和羅霖等。問到靚靚平日可會幫老公敷mask？她說：「唔使喇，咁大個人佢知咩啱敷，會自己拎啲mask嚟敷。不過佢好懶，成日臨急抱佛腳。」她指老公不喜歡美白，Chilam則說：「我曬得好辛苦，佢唔鍾意男人咁白。」問到Chilam是否貪靚？靚靚代他說：「要工作嘅時候就會。」此時Chilam即表示：「專業啦。其實自己個人比較隨意，因為我喺澳洲成長，嗰邊啲人好隨意，唔注重Fashion，我真係夠膽着睡衣出街o架。」
囝囝貪靚
靚靚更大爆：「佢可以夏天戴冬天帽，瞓覺嗰件底衫着埋出街，啲朋友一見佢一套衫着幾日就知道我出咗埠喇。」而Chilam就解釋說：「環保呀！喺佢嘅監管下我更加似明星。」靚靚就笑言：「佢型我先有飯開。（你自己都有。）唔使食自己咁多吖嘛，食老公。」她又透露囝囝似她會貪靚和愛打扮。
疑似透點
另外，身穿白色衫的周嘉玲在射燈下似有透點之嫌，不過她否認是走光透點，並說：「白色啫。（每次都Check清楚先出門？）可以咁講，尤其有記者。」
文：名人組