陳奕迅唱情歌 冧唔掂老婆
陳奕迅（Eason）於前晚（英國時間）假英國舉行巡迴演唱會，「吹神」卻化身「冧神」不斷向老婆徐濠縈唱冧歌，但阿徐卻抵死縮膊以示肉麻。
陳奕迅成為首位華人歌手在英國The O2 arena開騷，於英國時間前晚舉行巡迴演唱會，二萬座位爆滿，部分歌迷更專程由不同地方飛到當地捧場。而Eason老婆徐濠縈、好友梁漢文及唱片公司高層黃劍濤夫婦亦現身打氣。
Eason在個唱上多次向阿徐送冧歌，望住對方唱出「我只想跟你浸在愛河」，由於阿徐覺得肉麻，即做出縮膊伸脷動作，抵死的Eason即改歌詞繼續唱「而你那縮膊絕對都能溶掉我。」
公開房號歡迎拍門
Eason還鬼馬讀出自己房號，他說：「你們可以今晚十二點過後來找我，十二點前不要來，因老婆未瞓，不過來了之後，要睇清楚是否我的Cup Of Tea，因我老婆太靚，唔係人人都可以過關。」
腳部手術後首次站台的Eason坦言有點累，他說：「可能係時差關係，加上之前做完手術，體力上未回復過來，不過當係2012巡迴Warm Up，之後有20場要做。」
文：音樂組