黃秋生：得閒見不知幾好

我同老婆唔係婚後三日就分居，而係嗌大交，不過一個禮拜後冇事，仲一邊望住佢煮飯，一邊寫歌，不知幾溫馨。我有自己住嘅地方，但我唔會叫咁樣係「分開住」，咁只係大家畀大家各自嘅生活空間，對大家嘅關係都會更好，我唔係冇試過同老婆一齊住，婚後有段時間，我成日留喺屋企，煮飯、打足球game，但係老婆日哦夜哦：「仲唔去瞓！」飲酒又哦，睇書又哦，咪盞嗌交。有啲人會覺得咁做好怪，但我同老婆依家係得閒先見面，關係不知幾好，其實好多已婚人士都有呢個諗法：如果可以分開住就好。

我嘅個性加埋工作性質，分開係會更好，我成屋關刀、戲服、劇本、阿爸阿媽相，架生又多又亂，但係我亂中有序，不過做老婆嘅見亂就會執，萬一掟咗我啲嘢當垃圾咪死！

黃秋生的緋聞多姿多彩，呂慧儀（右）亦曾被指是其女友。

黃秋生強調緋聞女友之一的李蘢怡是被屈「硬食」。

老婆懶理緋聞

不過呢行啲男人一早被當成除咗鹹濕就冇朋友，我老婆試過晨早六點，接到啲八婆朋友電話，問佢有冇睇報紙，「黃秋生拖女乜乜物物」，我老婆醒呀！「係咩，哦！」班八婆冇癮下次就唔再擾人清夢。講真啲緋聞真係多到我都唔記得，都係夾硬塞畀我，好似李蘢怡就真係富貴，亂寫！影到我同女助手，又話「新女上場」；影到我同經理人，又話呢個係我老婆！點解我唔拖老婆出嚟多啲見人？嘥氣，到真係影到我同我老婆行街，咪又話我轉性、忽然覺醒，況且佢都忙搞自己事，邊有時間！

總之我依家喺度預告定我下個緋聞目標，就係我美麗嘅化妝師，喂，快啲嚟影啦喂！唔影就笨呀！

口述：黃秋生

筆錄：影視組

攝影：司徒國榮