黃耀明出櫃：我係基佬！

繼已故巨星張國榮、導演關錦鵬、歌手林一峰後，出道27年的黃耀明，成為香港娛樂圈第4位大膽直認同性戀藝人！前晚明哥和劉以達在紅館舉行尾場「達明一派兜兜轉轉演演唱唱會」，全場逾萬觀眾座無虛席，還吸引楊千嬅、蔡一智夫婦、蔡一傑、古巨基、薛凱琪等捧場，千嬅和智嫂兩個大肚婆high到企起身拍掌，全場觀眾亦情緒高漲，氣氛熱爆。

全場尖叫

當個唱進行至尾聲，戴住帽破格造型的明哥，演繹完同志歌《禁色》和《忘記他是她》後，緩慢地除下帽放在台上，然後步近台前觀眾，嚴肅說：「第一晚啲人問我黃耀明係咪同志？如果嗰句意思係地下黨，我唔係地下黨同志，由1988年借陳少琪支筆寫《禁色》，然後1989年借周耀輝支筆寫《忘記他是她》，我從來冇隱瞞我嘅身份。」

劉以達為明哥之言感動。

黃耀明前晚在台上大聲宣布自己係同性戀者。

然後，明哥勇敢地大聲向着逾萬觀眾直認「出櫃」：「我係同性戀者，我係基佬，我希望其他同性戀人同基佬唔需要驚，唔需要好似《禁色》歌詞：『願某日子，不須苦痛忍耐，將禁色盡染在夢魂內……讓我就此消失這晚風雨內，可再生在某夢幻年代。』」全場尖叫拆天，掌聲雷動，捧場的眾星全部企身拍掌支持，更有觀眾感動落淚。

拋開禁忌的明哥，坦蕩蕩地直斥社會守舊：「我哋係21世紀，唔需要再夢幻有一日愛邊個人，唔需要你批准，唔需要大家去猜我係咪同志。」明哥再次高呼：「我係同性戀者，我係G~a~y，Gay，基佬，我鍾意男人；唔好意思各位傳媒掃你哋興，我仲要唱25年歌，你哋唔需要再問我呢個話題，以後冇嘢可以再講，今晚講完就算，多謝大家。」接着出場的阿達走近明哥，說：「今晚令我好感動，我都好愛明哥，神都好愛明哥，神愛同志、病人、罪人。」

完騷後，達明在慶功宴接受訪問，明哥否認有部署公開基民身份，問是否如釋重負？他坦言：「從來冇重擔，點解今晚會講，係因為自己唱咗咁多年歌，社會都冇變過，年輕一代唔敢話畀屋企人知，依家21世紀，呢個騷好關於香港，但價值觀愈嚟愈恐怖、唔開放，所以我覺得應該攞出嚟講。」問會否鼓勵同行基民效法？明哥說：「唔鼓勵，每人有唔同做法，有啲人好驚呢樣嘢，但我覺得唔需要恐懼，但亦唔需要撩出嚟，係個人選擇。」

男友捧場

明哥坦言男友有捧場，問他會否結婚？他笑說：「暫時唔會，因為香港冇，下一步希望為香港爭取權利。」此外，問明哥公開基佬身份怕唔怕返大陸有阻礙？他反問：「點解？如果我唔畀入去好大件事，大陸好多呢啲人，如果係咁國家退步得好緊要。」昨晚明哥在微博留言：「誰介意晚節會不保，笑一笑已蒼老。謝謝各位，I'm Pretty Happy and Gay。」

此外，明哥「Come Out」承認自己性取向，同志組織香港彩虹發言人Tommy表示，雖未有計劃邀請明哥宣傳兩性問題，但直言極欣賞其勇敢行為，認為這是勇氣及忠於自己的表現。

採訪：音樂組