陳芷敏 陶嘉瑩清純形象吸客
o靚模組合冬甩今年會繼續出寫真，除舊有成員外，亦會加入新血、有「翻版Baby」之稱的陶嘉瑩（Elise），她直言幾年前已開始被同學及朋友仔冠以「翻版Baby」的外號：「可能我分中間界，依家好少女仔會咁分，感覺似Baby啱啱出道嗰時，我本身都好鍾意Baby，覺得佢着衫好靚，都有睇過佢啲寫真。」
她將跟其他冬甩成員合作，當中包括師姐陳芷敏（Elke），Elke比Elise年長三年，但只相處幾天已非常熟落，絕無代溝！兩女都走清純路線，暫無意跟其他o靚模鬥性感，認為各有市場，Elke：「我入行到依家都唔係行性感，有啲客戶都係因為我形象清純先搵我拍廣告，暫時都想繼續以呢個方向行住先！」