徐濠縈驗胸 Eason樂於効勞

徐濠縈（阿徐）、宣萱、Amanda S.、黃偉文等，昨日出席《BReast Concern Action關．乳．愛—Campaign Butterfly》巡迴展覽啟動禮。阿徐透露一直有定期全身檢查，被問到是否會自己檢查乳房，她笑着說：「有，我個範圍好細，好快check完，但都唔可以輕視。（叫老公幫手？）都得，佢好樂意做。」

老公肚腩大過胸

另外，她表示慶幸家族沒有遺傳性癌症，至於Eason爹哋有肝癌是否會遺傳，阿徐說：「佢爹哋好番啦，依家Eason最大問題係肚腩大過胸，同埋膽固醇高。（叫佢唔好食咁多好嘢？）佢唔食好嘢，食即食麵，好似小朋友，我今朝先捉到佢食，佢話忍唔住。我都想捉佢去睇營養師，佢有睇中醫，要佢戒口唔好食貝殼類，牛肉都燥，咖啡、奶茶都唔好飲，我已同佢助手及司機夾埋，如果佢話要食牛雜，就話賣晒，唔好畀佢食。」阿徐續指又要照顧老公又要照顧囡囡好忙，一向對囡囡愛護有加的阿徐，被笑指照顧囡囡與老公是否9比1，她說：「冇，7比3啦！」

阿徐要Eason戒口，以保健康。（資料圖片）	宣萱笑言不急於找伴侶，緣分到自然會出現。	Amanda S.表示會自我檢查胸部。

宣萱慶幸未結婚

同場，宣萱以愛心大使身份出席，她透露由25歲開始每年都會去身體檢查，每個月亦會自我檢查乳房。現時單身的她，表示都有留意《盛女愛作戰》，但她並不急於找伴侶，她說：「我相信到時自然會出現，唔會主動搵。我身邊有結婚或離婚嘅朋友，反而好羨慕我單身，我相信如果10年前結婚，我諗都會離婚，因心態未成熟。」

文：名人組