黎耀祥無底線 愈奸愈過癮
黎耀祥在新劇一反過往忠義角色演奸角，他坦言不會有所保留，認為奸到盡才讓自己過足戲癮。面對北上拍劇掘金潮，黎耀祥似乎不為所動，他說：「大陸拍劇好似坐監。」
「視帝」黎耀祥近年清一色以正派形象示人，四年前拍下的倉底貨《盛世仁傑》近期重出生天，劇中的他一反過往忠直角色，以奸雄姿態與鄭則士大鬥法。問到黎耀祥可擔心觀眾不接受他演奸角？他說：「近年都冇乜演過奸角，今次可以話過足戲癮，演員唔應該畀自己框框，幾衰嘅角色都唔應該留一線，咁先好玩。」
《盛》賣點落在「視帝」黎耀祥單挑「影帝」鄭則士身上，他說：「同鄭則士合作好好玩，可以擦出火花，呢類戲一定要兩個人都夠分量先做到，產生到嗰種張力，遇強愈強先鬥到。」
寧揀美加登台
近年內地製作以銀彈誘香港演員北上，有價有市的黎耀祥卻不為所動，最近與無綫續約的他說：「TVB人工當然唔可以同外邊直接比較，但係有TVB嘅平台先有美加登台。其實內地拍劇比香港辛苦十倍，雖然休息時間會好啲，但要適應天氣，好多年前我都試過，好似坐監咁o架，收工就返房休息睇劇本，好枯燥，香港辛苦極都可以返屋企呀。」
採訪：影視組
攝影：黎志輝