周志文被爆愛集郵 黃子菲認中伏

被指力追港姐馬賽的大孖周志文，縱然在電台澄清緋聞，又口口聲聲指自己不會再拍半裸照，以後專心工作，可是他的舊情史依然愈揭愈多！昨日有讀者主動爆料，直指他的溝女行為「全TVB由掃地阿嬸至高層都知佢係食家」！

周志文被爆曾力追不少女星，更指他的行為廣為人知。

傳與周志文分手的袁聖殷不相信對方花心。

曾追o靚模

該名知情者指大孖入行後溝女無數，更曾被爆追求昔日電視台花旦文雪兒的女兒張筠，但他與女方拍拖後便飛甩對方，轉追梁靖琪、莊思明、o靚模黃子菲和陳靜儀等！昨日記者致電已為人妻的黃子菲，她聞言大表驚訝：「吓！你點知o架！不過係好耐嘅事，我都結咗婚啦，（點識佢？）佢喺微博私訊我，本身唔識o架，之後我見大家都係呢行就畀咗電話佢，間中食飯，（佢有冇送禮物畀你？）我唔想講太多喇，總之我哋冇一齊過！（話佢係食家？）我覺得佢又唔係咁，唔知係咪佢對我好，所以我唔覺。（話你當時已有有錢男友？）嗰時我單身，只係有人追。」

不作回應

至於傳與大孖分手的袁聖殷（CoCo）說：「唔相信佢為人係咁，（知唔知對方嘅感情係咁？）冇過問，因為信佢，一齊嗰時佢好專一。」周志文透過經理人回應說：「依家專心工作，唔作任何回應！」

文：專案組